Сабийлени бла жаш тёлюню чыгъармачылыкъларыны юйюнде къызла бла жашла, не жаны бла да къошакъ билим ала, кеслерини адабият, тил, маданият, саулукъ сакълау жаны бла да кёз къарамларын айнытыргъа ахшы онгла табадыла. Сёз ючюн, аладан бири «Филология студияды». Аны мында сынамлы устаз Геляхланы Мазиля бардырады.
Бу кюнледе уа аны студиясына жюрюген сабийлени Мазиля Сафаровна «Форма-Алам-Жер» деген кёрмючлю проект бла шагъырейлендирирге элтгенди. Ол а Воронежде жашагъан художникле Сергей Бруданин бла Михаил Рихтер жарашдыргъандыла. Андан сора да, композиция кесини энчилиги бла сейирди.
Аны юсюнден сабийле устазларына кеслери да айтхандыла. Художниклени-дизайнерлени ишлеген суратлары жаланда формалары бла бирсиленикилеге ушамагъанла болуп къалмай, аланы бир башха жумушха хайырланыргъа да жарайдыла. Сёз ючюн, Жюзжыллыкъны паркыны кёрмючле къуралыучу павильонуну келечилери билдиргеннге кёре, аланы бир-бирлеринде таш эмда агъач габуланы (мох) неда башха тюрлю хансланы ёсдюрюрге болады.
Кёрмючню живопись бёлюмюнде Сергей Бруданинни ишлери бла шагъырейленир онг болгъанды. Сабийле суратны бла аны тёгерегин къуршалагъан затны бир бирге къалай тап келишгенлерине эс бургъандыла. Нек дегенде художник гетен къумачны (полотно), къангаланы, терезе эмда эшик рамаланы, темирни, къабыргъаланы тёртгюл кесеклерин окъуна хайырланнганды. 
Ол амал а суратланы бир башха, энди ишлене тургъан затха ушатады эмда аны ючюн бютюн сейирди. Андан сора да, жылны кезиулерин ачыкълагъан чыгъармалада, алада уа кёк жашнагъан, кюн бата неда чыгъып келе тургъан, жауун огъесе къар жаугъан чакъланы кёресе, авторланы къол ызларыны энчиликлерине, бир башхаланыкъына ушамагъан кесиликлерини магъанасын, хунерни кючюн да ангылайса.
Кёрген затлары илхамларын къозгъагъан эмда учундургъан сабийле уа энди «Сёзню искусствосу эмда кёз бла къарап кёрюрге болгъан аламла: сурат ишлеу, графика, дизайн» атлы жангы чыгъармачылыкъ проектни къураргъа оюмларын билдиргендиле. Аланы паркга жолоучулукълары уа кюз артыны таза хауасында оюнла бла бошалгъанды.
Мокъаланы Зухура.