Нальчикде Жаш къараучуну театрында миллет маданият араланы «Бирликдеди бизни кючюбюз!» деген республикалы фестивальлары ётгенди. Ол 4 ноябрьде белгиленнген Халкъ бирликни кюнюне жораланнганды. Аны Нальчик шахарны администрациясыны жаш тёлю политика жаны бла управлениясы, Владимир Вороков атлы Маданият фонд, Халкъла аралы черкес ассоциация КъМР-ни Миллетлени ишлери эмда жамауат проектле жаны бла министерствосуну себеплиги бла къурагъандыла.
Театрны уллу отоуунда жаш тёлюню, жашаулары келгенлени, Россейни кёп регионларындан солургъа келгенлени да кёрюрге боллукъ эди. Сыйлы къонакъланы араларында уа КъМР-ни Башчысыны энчи келечиси Уяналаны Аминат, КъМР-ни Парламентини Билим бериу, илму, физкультура, спорт эмда жаш тёлюню ишлери жаны бла комитетини таматасы Нина Емузова, КъМР-ни маданият министрини орунбасары Къарчаланы Аминат, КъМР-ни миллетлени ишлери эмда жамауат проектле жаны бла министрини орунбасары Гергъокъланы Джамболат да бар эдиле.
Къабарты-Малкъарда бир бирлери бла келишиулюкде жашап тургъан кёп миллетлени келечилери фестивальгъа тынгылы хазырланып келгендиле. Аланы къайсы миллетден болгъанларын кийимлерине кёре билирге боллукъ эди.
Байрам Россейни эмда Къабарты-Малкъарны гимнлеринден башланнганды. Ызы бла сахнагъа концерт программагъа къатышырыкъла чыгъып, «Мени Къабарты-Малкъарым» деген жырны бирден айтхандыла.
Къууанчлы ингирни Къулийланы Къайсын атлы Малкъар драма театрны артисти Мызыланы Аубекир бардыргъанды. Ол республикада жюзден артыкъ миллетни келечилери жашагъанларын эсгертип, бу фестивальда ала маданиятда, искусствода да жетишимлерин кёргюзтюрюклерин чертгенди.
Нина Емузова фестиваль 14 жылны ичинде бардырылгъанын айтып, аны къурагъанлагъа ыразылыгъын билдиргенди. «Кертисин айтханда, быллай къууанчлагъа келсенг, азыракъ айтып, кёбюрек тынгыларыгъынг келеди. Бюгюн жюрегинг сюйген юйюр байрамдача сезебиз кесибизни: столла да тюрлю-тюрлю ашарыкъладан толупдула. Таулу эмда дюгер хычинле, айран, боза, оруслу бёрекле, дагъыстан хинкал, къабартылы далян, бирин айт да, бирин къой!»,- дегенди.
Къарчаланы Аминат а:«Барыбызны да ма былай, бир бирни ангылап, жашау этгенибиз уллу насыпды. Ол келир заманыбыз да бир боллугъуна шагъатды!», - дегенди.
Гергъокъланы Джамболат а Россейни бек уллу байлыгъы аны жеринде жашагъан кёп миллетле болгъанларын къатлап айтханды. «Аланы бирликлери кюч береди къыралыбызгъа»,- деп белгилегенди ол.
Маданият фондну таматасы Люаза Макоева уа фестивальгъа Къабарты-Малкъарда жашагъан халкъланы маданият араларыны барысы да къатышханларын, аланы тынгылы хазырланнганлары хар не ишде да кёрюннгенин, бек башы уа – ала миллет энчиликлерин сакълагъанларын айырып айтханды.
Жюриге уа белгили маданият эмда жамауат къуллукъчула киргендиле, алагъа Нальчик шахарны администрациясыны келечиси Анзор Афашагов башчылыкъ этгенди.
Фестивальгъа къатышханла усталыкъларын аямагъандыла: тепсеген, жырлагъан да этгендиле, назмула айтхандыла, къол чемерликлерин да кёргюзтгендиле. Кёп жаны бла эм игилеге Нальчикде автомобиль эмда жол транспорт колледжни окъуучулары саналгъандыла. Алагъа эмда айырмалы болгъан башхалагъа да саугъала берилгендиле.
«Алан» жамауат организация бла КъМКъУ-ну Отарланы Керим атлы маданият арасы малкъар халкъны миллет тёрелерин бла ашларын аламат кёргюзтгенлерин да белгилерчады. Аланы кёрмючлеринде уллу кийизни юсюнде таулуланы эртте заманларында къолда жюрютген аберилерин кёрюрге боллукъ эди.
Холаланы Марзият
