Быйылны аллындан бери «Россети Северный Кавказ» - «Каббалкэнерго» биригиуню келечилери уллу борчлары болгъанланы ток ыздан кесерча 75 847 заявка бергендиле. Саулай алып айтханда, ала хайырланылгъан электрокюч ючюн 166,8 миллион сом берирге керек эдиле. Болсада, чек салынырыгъын ангылагъанларында, аланы 93,5 проценти борчларын жапхандыла. 
Алай уллу кёллюлюк этген 3 051 бузукъчу токсуз къалгъандыла. Бусагъатда аланы 9,8 миллион сом берликлери барды. 
Эки айдан аслам заманны тёлеулерин бермей тургъанла ток ыздан кесилирге боллукъдула. Алагъа, ток бла жалчытылыныр ючюн, борчларын толусунлай жабаргъа тюшерикди. Ол санда ток чыбыкъны кесгенлерине эм къошханларына да кеслери тёлерикдиле. Аны ёлчеми объектни къыйынлыгъына кёре болады. Сёз ючюн, энчи арбазны иеси – 3 минг, организацияны таматасы уа 10 минг сом берликди. 
Андан сора да, энергетикле ток ызлагъа эркинликсиз къошулгъанланы билир муратда 4 268 абонентни жокълагъандыла эмда 167 бузукълукъ ачыкълагъандыла. Аны бла байламлы материалла ич ишлени органларына берилгендиле. Ала административ жууапха тартыллыкъдыла эм къаллай бир ток урлагъанларына кёре тазир тёлерикдиле. 
Токну урлагъанла Административ бузукълукъланы кодексини 7.19-чу статьясына тийишлиликде (Сетьлеге эркинликсиз къошулгъанлары эм токну эсеплеген приборсуз хайырланнганлары ючюн) тазир тёлерикдиле. Аны ёлчеми энчи иелилеге – 10-15 минг сомгъа эм организациялагъа уа 100-200 минг сомгъа жетеди. Экинчи кере эркинликсиз ток ызгъа къошулгъан энчи иеге 15-30 минг сом тазир тёлерге тюшерикди. Аллай бузукълукъ этген организациягъа уа аны ёлчеми 300-400 минг сомгъа жетеди. Бир-бирле РФ-ни Уголовный кодексини 165-чи статьясына кёре эки жылгъа тутулургъа да боллукъдула.
Эсге сала айтсакъ, энергокючню урлагъан уллу хатагъа келтирирге боллукъду. Кеслери алларына къалай болса да тартылгъан ток чыбыкъла от салыргъа, адамны саулугъуна хата жетдирирге къоркъуулудула.
Курданланы Сулейман.