Нальчикде тийрени жашиллендириуге аслам эс бурулады. Анга кёре жыл сайын мингден аслам терек орнатыргъа белгиленеди. Бу жумуш районланы барында да толтуруллукъду.
Жашиллендириу жаны бла программа ара шахардан башланнганды. Аны чеклеринде Тарчоков, Головко орамлада, кёп болмай а Ленин атлы проспектде да узунлукълары 5-6 метрге жетген 59 чакълы жёге орнатылгъанды. Кенжеде уа жаш туяла салыннгандыла. Битимлени тамырларында топуракълары сакъланнганлары себепли жангы жерде терк айнырыкъларын да энчи белгилерчады.
Шахарны жашиллендириуге ахча муниципал бюджетден бёлюннгенди. Башында айтылгъаныча, быллай иш мындан арысында да тири бардырыллыкъды. Ол шарт, тёгерекни айбатландырыргъа себеплик этгенден сора да, шахарлада бла элледе экология болумну игилендирирге ахшы къошумчулукъ боллукъду.
Терекчикле жангы жерледе эм эски тереклени орунларына да салынырыкъдыла. Анга кёре питомникледе тюрлю-тюрлю терекледен иги кесеги орнатылгъанды. Алай бла беш жылны ичинде, юлкюлени санамай, бир жылгъа 10 минг терек салыргъа онг табыллыкъды.
