Нальчикде тротуарланы аслам кесеги иги да тозурагъанды. Ол да сейир тюйюлдю: ала ишленнгенли кёп жыл болады, ремонт этилмегенли да иги кесек заман озгъанды. Жарсыугъа, бир-бир жерледе быллай объектле арталлыда жокъдула. Ма ол себепден мэрияда аланы жангыртып башларгъа оноу этилгенди.
Шахарны администрациясыны башчысы Таймураз Ахоховну буйругъу бла шёндю тийишли муниципал программа жарашдырыла турады. Жангыртыу ишле уа аны да сакъламай башланнгандыла. Сёз ючюн, бу кюнледе Головко орамда биринчи номерли сабий поликлиниканы къатында тротуаргъа ремонт этилип башланнганды. Жууукъ кезиуде уа Шортанова, Ашурова, Щаденко эмда Ленина орамланы бир-бир жерлеринде да мадар этилликди, деп билдиргендиле жер-жерли администрациядан.