Кавказ Ищхъэрэм и щIыналъэхэм (КИФЩI) я IуэхущIапIэхэм ящыщу «Кавказым къыщыщIагъэкIащ» серти­фикатыр зратахэм я куэдагъымкIэ Ставрополь крайм япэ увыпIэр иIыгъщ. Апхуэдэ дэфтэру 25-рэ а щIыналъэм нобэкIэ иIэщ. КъыкIэлъыкIуэр Къэбэрдей-Балъкъэ­рырщ, сертификату 10 къыхуагъэфэщауэ. АдэкIэ къокIуэ­хэр Дагъыстаныр (сертификату 7), Осетие Ищхъэрэ-Аланиемрэ Ингушымрэ (тхурытху), Къэрэшей-Шэрджэсымрэ Шэшэнымрэ (плIырыплI).

«Кавказым къыщыщIагъэкIащ» пэхуэщIэм нэхъыбэу хэ­тыр IэпэIэсэхэмрэ мэкъумэш IуэхущIапIэхэмрэщ. Псэуа­лъапхъэ­хэмрэ Iэмэпсымэхэмрэ къыщIэзыгъэкIхэми апхуэдэ сертификатхэр жыджэру къыIах хъуащ. 
КИФЩI-м и IуэхущIапIэхэм къыщIагъэкIхэм фIагъ яIэр зы­хуэдэр къапщытэу (IуэхущIапIэхэм я фIэфIыныгъэ хэлъу), абы хуэфащэ «Кавказым къыщыщIагъэкIащ» сертификатыр иужькIэ ахэм етыжыныр къыхэзылъхьар Роскачествэм-рэ КавказРФ-рэщ, УФ-м Экономикэ зыужьыныгъэмкIэ и ­министерствэм и дэIэпыкъуныгъэ хэлъу. ПэхуэщIэм хы­хьэу, япэ IуэхущIапIи 100-м я сертификатхэм пщIэ щIатынукъым.
Каваказ Ищхъэрэм и IуэхущIапIэхэм дэфтэрым Iэмал къарет я продукцэхэр къэралым и адрей щIыналъэхэм нэхъыфIу къыщацIыхуа, щыпхагъэкIа, сату щIыпIэщIэхэр къыщагъуэта хъунымкIэ. 
Урысей Федерацэм и Президентым ипэIуэкIэ къыхилъ­хьащ, щIыналъэхэм я продукцэхэр (брендхэр) къэрал кIуэ­цIым къыщегъэцIыхуным ехьэлIа лэжьыгъэр щIэгъэхуабжьэн хуейуэ. Мис абы къыхэкIыу, «Кавказым къыщыщIагъэ­кIащ» сертификатым и мыхьэнэми хэхъуэнущ. Дэфтэрым и фIыгъэкIэ КИФЩI-м и IуэхущIапIэхэм къэралым и нэгъуэщI щIыпIэхэм зыкъыщрагъэцIыхуфынущ, щэхуакIуэхэр къы­щы­дахьэхыфынущ, щIэупщIэми щыхагъэхъуэфынущ. 
Фигу къэдгъэкIыжыныщи, «Кавказым къыщыщIагъэ­кIащ» япэ сертификатиблыр IуэхущIапIэхэм езытар УФ-м и Правительствэм и УнафэщIым и къуэдзэ Новак Алек­сандрщ, 2023 гъэм и кIэхэм Мэзкуу къалэм щекIуэкIа «Урысей» дунейпсо гъэлъэгъуэныгъэ-зэхуэсым щыIэу.

ХЬЭЩЫКЪУЕЙ Олег.