Къабарты-Малкъарны Жамауат палатасыны кезиулю жыйылыуунда власть органланы, жамауат биригиулени келечилери бла алимле къатышхандыла, ала миллет-маданият граждан обществону мурдоруду деген оюмгъа келгендиле.

Жыйылыуну палатаны маданиятны айнытыу, тин ниетни сакълау эм асламлы информация амалла жаны бла комиссиясыны башчысы Атмырзаланы Магомет бардыргъанды. Ол, сёзюн башлай, Шимал Кавказны халкъларыны араларында байламлыкъланы сакълауда уллу магъананы адет-тёрелеге сакълыкъ тутханын белгилегенди.

- Таматалагъа хурмет этиу, тарыхны багъалау, социал-экономика энчиликлерибиз миллетлерибизни дуниягъа кёз къарамларын тохташыуунда ызларын къойгъандыла. Тёрели маданиятха бюгюнлюкде эс буруу жамауатны тарых эм этнокультура хазнасына да сейирин къозгъагъанды. Халкъ маданиятны даражасы ёсгени, инсанла миллетлерини тарыхын, ата-бабаларыны сынамларыны юсюнден билирге итиннгенлери бюгюнлюкде, глобализация болумлада, ала энчиликлерин сакъларгъа сюйгенлерини шартыды, - дегенди ол.

Миллетлени ишлери эмда жамауат проектле жаны бла министрини орунбасары Гергъокъланы Жамбулат айтханыча, Къабарты-Малкъар кёп миллетлени келечилери жашагъан регионланы санына киреди, алай эсе уа, аланы араларында келишиулюклю сакъларгъа тийишлиди. «Шёндю республикабызда 68 миллет биригиу ишлерин бардырадыла, аланы баш борчлары халкъ маданиятланы, ана тиллени, адет-тёрелени сакълауду, адамланы социо-маданият жашаугъа къатышдырыуду. Аланы проектлерин тамамлаугъа себеплик эте, биз кёп тёлюлени ичинде тохташхан шуёхлукъ байламлыкъланы кючлейбиз, адамланы бюгюннгю болумлада маданиятларыбызны, тарыхларыбызны, адет-тёрелерибизни тинтирге бла сакъларгъа кёллендиребиз», - дегенди Гергъокъланы Жамболат.

Айтылгъан бла байламлы палатаны граждан обществону институтларын айнытыу, миллетле эм динле аралы байламлыкъланы игилендириу, коммерциялы болмагъан секторну айнытыу жаны бла комиссиясыны башчысы Николай Маслов къыралны Президенти Владимир Путин «Россей: миллет соруу» деген статьяда айтханын эсгертгенди эм аны бла байламлы былай айтханды: «Кёп ёмюрлени ичинде Россей кёп миллетли къыралча айный келгенди, ала бир бирге юйреннгендиле, шуёх-тенг, иш, юйюр къурау жаны бла да къаршы байламлы болгъандыла. Бюгюнлюкде къыралыбызда, ол санда уа Къабарты-Малкъарда миллетле аралы халланы айнытыу халкъланы энчиликлерин да сакълап, аланы бирликлерин кючлерик амалды».

Республиканы Миллет музейини башчысы Феликс Наков а Жарыкъландырыу эм илму министерствону тарыхдан, маданиятдан, биологиядан дерслени музейде бардырыргъа чакъыргъанды: «Сабий тин байлыкъланы магъанасын, кёп тёлюле аны нек сакълай келгенлерин ангылар ючюн, аны маданият-тарых болумлагъа сыйындырыргъа тийишлиди. Музейде уа школ класс къураргъа битеу онгла бардыла. Мында окъуучула китапда кёргенлерине экспонатлагъа къарай тюшюнюрюкдюле».

Май районну администрациясыны маданият эм миллетле аралы байламлыкъла жаны бла бёлюмюню башчысы Юлия Пуртова жамауатны социал-экономика айныуунда маданият миллет тёрелени, тин хазнаны, ниет бирликни магъанасы уллу болгъанын чертгенди. Нальчикни администрациясыны терроризмден къоркъуусузлукъну сакълау, наркотиклеге къажау ишни бардырыу эм право низамны сакълау жаны бла бёлюмюню баш специалисти Мадина Мазукабзова уа миллет маданиятла бла тёреле адамлыкъны мурдорлары болгъанларын, инсанны тюз ниетлиликге юйретирге, осал къылыкъладан сакъланыргъа, аман ниетлени къуугъанлагъа алданмазгъа болушурукъларын белгилегенди. 

 Жамауат палатада Жаш тёлю советни башчысы, «Гармония» социал айнытыу араны таматасы Карина Пафифова, жаш тёлю арада халланы юслеринден айта, ала бу жаны бла кёп тюрлю иш тамамлагъанларын, ол санда миллет байрамлагъа эм тарых магъаналы кюнлеге атап тюбешиуле, ингирле бардыргъанларын билдиргенди. Юлгюге, Россейни кюнюне «Зауукълу стартла», Ата журтну къоруулаучуну кюнюне «Хайдагъыз, жашла!» спорт эришиулени, Ата журт урушда Хорламгъа атап «Кюнлени ызларындан атла, атланы ызларындан тарых», «Росейни патриотлары» интеллектуал оюнланы, «Эсде тутабыз, ёхтемленебиз» викторинаны, Къырал байракъны кюнюнде турист жолоучулукъ ётдюргендиле. Аланы «Эсде тутууну чырагъы», «Хорламны чырагъы», Адыгланы эсгериу кюнлерине, Малкъар халкъны жангырыу кюнюне аталгъан акцияларына жаш тёлю сюйюп къатышханды, окъуучуланы араларында «Тукъум терек» эмда «Мени Ата журтум», туугъан Къабарты-Малкъарым» деген эришиулери сейир, зауукълу да болгъандыла.

  Жыйылыуда этилген докладлагъа кёре, сейирлери болгъан органлагъа бла жамауат биригиулеге эсгертиуле жарашдырылгъандыла, деп билдиредиле Жамауат палатаны пресс-службасындан.

Кульчаланы Зульфия.