Кюзню экиден бири озгъанды, къыш да жууукъдан жууукъ болуп келеди. Аны ючюн улоуланы чархларын сууукъгъа тийишли тюрлюлерине алышыуну къайгъысын этерге керекди. Экспертле айтханларыча, хауаны температурасы +5 градусха жете эсе, жай чархланы заманы чыгъады. Бирле уа аланы жети градусда окъуна алышыргъа чакъырадыла, къоркъуусузлукъгъа алай иги боллукъду, деп.

Бирле аллындан окъуна дыгалас этип, андан да жылыда алышыргъа ашыгъадыла. Алай ол терс ишди, нек дегенде, къыш чархла сууукъда асфальтда иги тутадыла, жылыда уа,  жумушап, терк ашалып кетедиле. Бек сууукъ болурун да сакъламагъыз, халкъ бла бирге басынып турмазча, аланы алышхан жерге аз алгъаракъ барса боллукъду.

Къыш чархланы эки тюрлюсю болуучуду, биринде темир шинжилери бардыла, башхасы уа жай чархха ушайды. Шинжилини жоллада бузкъаудан болуучу регионлада хайырланыргъа тийишлиди, къарда уа ол бирси тапды. Шахарлада, бютюнда уллу мегаполиследе, къышда жоллагъа бузну эритиучю химия тёгедиле, аны ючюн алада шинжили чархланы айландырыргъа кереклиси жокъду.

Алгъын а аллай чархлары болгъан улоуланы миялаларында «Шинжиле» деген белги жабышдырыргъа керек болуучу эди. Шёндю ол излем жокъду, аллай белгиси болмагъан улоуну иесине тазир да салынмайды.

Дагъыда бир магъаналы эсгериу: таможня союзгъа кирген къыралланы техника регламентинде  2015 жылдан сора  декабрьден башлап  февральны ахырына дери жаланда къыш чархланы хайырланыргъа жарайды деген излем барды. Аны жик жиги бла болжалын хар регион да кеси тохташдырыргъа эркинди. Къышда жай чархла бла айланнганы  ючюн КоАП-ны 12.5 статьясына тийишлиликде 500 сом тазир салынады. Алай кёбюсюнде водительлени бу жаны бла жууапха тартыу тёре хазна жокъду. Аны ючюн а уллу кёллюлюк этмегиз, билигиз, къоркъуусузлукъ кесигизни къолугъуздады!

Улбашланы Мурат.