Бу кюнледе Шимал Осетия-Аланияны ара шахары Владикавказда Маданият юйде белгили дюгерли поэт, суратчы, жамауат ишчи, осетин халкъны суратлау адабиятыны мурдорун салгъан Коста Хетагуров туугъанлы 165 жыл толгъанына аталгъан уллу жыйылыу болгъанды.

Аны ишине къатышыргъа Къабарты-Малкъардан да уллу делегация баргъанды. Аны  санында КъЧР-ни халкъ поэти Додуланы Аскер, жазыучула Абайланы Сакинат, Османланы Хыйса, Сарбашланы Азнор, Руслан Атабаев, Амир Макоев, Черек районну администрациясыны башчысыны болушлукъчусу Байсыланы Харун, КъМР-ни сыйлы журналисти Ахкёбекланы Аслан,  суратчы Байсыланы Ахмат.

Жыйылыуну Шимал Осетияны Жазыучуларыны союзуну председатели Борис Хозиев ачханды. Ол Костаны осетин литературагъа, тилге салгъан къыйыны уллу болгъанын айтханды, аны адамлыгъын да къошуп юлгюле келтиргенди, сора аны жашау эм чыгъармачылыкъ жолуну юсюнден хапарлагъанды. 

 Ызы бла Къабарты-Малкъардан  къонакъла  сёлешгендиле. Биринчи сёзню Додуланы Аскер айтханды. Ол сабий заманында анасы малкъар тилде кёлден Костаны «Ёксюзлени анасы» деген назмусун окъугъанын эсгергенди.  «Андан бери билеме сизни миллетни адабиятын. Бюгюнлюкде да жазыучуларыгъыз бла къаты байламлыкъ жюрютеме. Аланы айырмалы чыгъармаларын малкъар тилге кёчюрюп, «Минги-Тау» журналыбызда басмалай турабыз», - дегенди. Сора Хетагуровну  кеси кёчюрген  «Осуят» деген назмусун окъугъанды. 

– Мен къурулушда ишлегенде, - деп башлагъанды сёзюн Османланы Хыйса. – Костаны суратын таматабызны отоуунда кёрген эдим. Бу кимди деп соргъанымда, ол, анга къарай кетип, деменгили осетинлиди, деген эди. Андан бери кёп жылла оздула. Кесим жазып тебирегенли, аслам осетинли жазыучула бла байламлыкъ жюрютеме. Алгъаракъда уа сизни белгили поэтигиз Энвер Хохоев бла бирге «Ассалам алейкум. Юйюгюзге да игилик!» деген китабыбыз чыкъгъанды, юч тилде – малкъар, осетин эм орус. Арада байламлыкъны жюрютюрге ол уллу себеплик этерикди.

Абайланы Сакинатха да жыйылгъанла эс буруп тынгылагъандыла. Костаны осетин литератургъа салгъан къыйынын белгилеп, малкъарлы къыл къобузчу Абайланы Солтан-Бек къауум заманны Владикавказда жашап, аны маданият жашаууна уллу къошумчулукъ этгенин айтханды. Алты айны ичинде музыканы сюйген ол тийрели адамладан аламат оркестр къурагъанын да эсгергенди, ала Москваны, Петербургну усталарындан артха къалмай сокъгъанларын чертгенди.
Андан сора Сарбашланы Азнор, Руслан Атабаев, Амир Макоев сёлешгендиле. Азнор Костагъа атагъан тизгинлерин окъугъанды. Руслан а къабарты тилге кёчюрген назмусун айтханды. Амир эки республиканы жазыучуларыны араларында байламлыкъланы юслеринден хапарлагъанды.

Байсыланы Харун а бу кюнледе бизде малкъар халкъны литературасыны мурдорун салгъан Мечиланы Кязим хажини да 165-жыллыгъын белгилегенибизни юсюнден айтханды. «Эки миллетни деменгили адамлары бир жыл, бир айда туугъандыла. Мындан арысында да алача белгили адамларыбыз кёп болсунла», - дегенди. Ызы бла Кязим хажини юйюню суратын саугъа этгенди къонакъбайлагъа.

Жыйылыуда болгъанла бизден баргъанланы тауушлукъ къарсла бла хурметлегендиле. Андан сора Костаны назмуларын, аны сёзлерине жазылгъан жырланы айтхандыла. Жыйылыу кеч ингирге дери барып, ары келгенле уллу зауукълукъ алгъандыла.
Коста Хетагуровну юбилейине аталгъан магъаналы ишни «Махдух» журналны баш редактору Оксана Хетагурова эм аны биргесине ишлегенле къурагъандыла.

Суратда:(солдан онгнга) Ахкёбекланы Аслан, Байсыланы Харун, Амир Макоев, Додуланы Аскер, Абайланы Сакинат, Османланы Хыйса, Сарбашланы Азнор, Руслан Атабаев.

Лейлун улу Х.