Мэкъумэш хозяйствэмрэ ерыскъыхэкIым елэжь промышленностымрэ я лэжьакIуэхэм я махуэр щагъэлъапIэм ирихьэлIэу Налшык къалэм дэт шыгъэжапIэм и гупэм деж иIэ утыкум иджыблагъэ мэкъумэш-промышленнэ гъэлъэгъуэныгъэ зэрыщрагъэкIуэкIам и гугъу фхуэтщIауэ щытащ. АтIэ абы ирихьэлIа цIыхухэм яфIэгъэщIэгъуэн хъуащ ялъэгъуа псори - республикэм имызакъуэу я цIэхэмкIэ (бренд жыхуаIэмкIэ), я фIагъхэмкIэ къэралым и нэгъуэщI щIыналъэхэми фIыуэ щацIыху, щэхуакIуэхэм ягу ирихьа ерыскъыхэкIхэмрэ псыхэкIхэмрэ.
Псалъэм папщIэ, абыхэм яхэтащ «Лъэгъупыкъу» IуэхущIапIэм «Морсок» фIэщыгъэр зэрихьэу къыщIигъэкI пхъэщхьэмыщхьэпсхэр. «Фрукт-Трейд»-м и «МыIэрысэ» брендым и цIэ дахэри дэнэ щIыпIэкIи щызэлъащIысащ. Абы и мыIэрысэпсхэмрэ мыIэрысэм къыхэщIыкIа чипсхэмрэ щIэупщIэ щаIэщ къэралым и щIыпIэ куэдым.
Къэбэрдей-Балъкъэрыр и нарзаныпсхэмрэ псыIэфIхэмкIэ зэрыцIэрыIуэр псоми ящIэ. «Живая вода» IуэхущIапIэм «Бабугент» брендыр зэрихьэу къыщIигъэкI нарзаныпсым иджыпсту утыкур иIыгъщ. «Аква-Кристаллыр» къызэрацIыхур «ICE MOUNTAIN» брендымкIэщ. «Налшык» хьэлвэ заводым и нарзаныпсхэри я фIагъкIэ дуней псом хэIущIыIу щыхъуащ куэд щIауэ. Хэт зымыцIыхур газ зыхэт «Шхельда», «Тэрч», «Налшык» псы гурыхьхэр?! «Каббалкресурсы» IуэхущIапIэм и «Долинск», «Нартсана», SABR псыхэри абыхэм къабгъурытщ.
Къэрэгъэш и шэ заводым «Домик на хуторе» фIэщыгъэр зэрихьэу къыщIигъэкI гъэшхэкI продукцэхэм къэралым и щIыналъэ куэдым я сату щIыпIэхэми уащрихьэлIэнущ. Налшык къалэми цIэрыIуэ брендхэр иIэщ. Абыхэм яхэтщ «Чабан», «Новая деревня», «Дольче Вита», «Горянка», «Хозяюшка Альпийских лугов», «Фермер», «Альпаро» гъэшхэкIхэр. Мыбыхэми я фIагъым затезыгъэгуса щыIэуи къыщIэкIынкъым. «Светловодский» шэ комбинатым ей «Диво», «Молочная лавка» гъэшхэкIхэми зи цIэхэр ипэкIэ къитIуа брендхэм зыкъыкIэрагъэхуркъым.
Дзэлыкъуэ щIыналъэм и кIэртIофхэм я хьэлыуагъкIэ, IэфагъкIэ зыхуэбгъэдэн щымыIэу апхуэдэщ, езы брендым зэрихьэри «Дзэлыкъуэ кIэртIоф» фIэщыгъэрщ.
«Агро-Инвест», «Зеленая компания» консерв заводхэм къыщIагъэкI хадэхэкI фIэIугъэхэр «Довгань» дамыгъэм щIэтщ. Ахэр джэш хъурейм, нартыху IэфIым, нащэм, бэдрэжаным, нэгъуэщIхэми къыхэщIыкIахэрщ.
ЩIыналъэм къыщIигъэкI мэкъумэш продукцэхэр хамэ щIыпIэхэм фIыуэ къыщацIыхун папщIэ, абыхэм я фIэщыгъэхэр хэIущIыIу щIыным, цIыхухэм нэхъыбэу егъэцIыхуным мыхьэнэшхуэ иIэщ, туристхэмрэ инвестицэхэмрэ ди щIыналъэм нэхъыбэу къешэлIа хъунымкIэ, экономикэм хэхъуэ къегъэщIынымкIэ.
БЭБЭЧ Бэчыр.
