УФ-м и компартым къызэригъэпэща «Зауэм и бынхэр» жылагъуэ зэгухьэныгъэм и Къэбэрдей-Балъкъэр къудамэм хэтхэм, жьы хъуа цIыхухэм жэпуэгъуэ мазэр хухахауэ, республикэм и къалэхэмрэ къуажэхэмрэ дэт щэнхабзэмкIэ унэхэм, курыт еджапIэхэм зэхыхьэ дахэхэр щрагъэкIуэкI.
Апхуэдэу, зи гугъу тщIа а зэгухьэныгъэм Аруан районым щиIэ и IуэхущIапIэм и унафэщI Джатокъуэ Казбекрэ компартым и район къудамэм и япэ секретарь, Къэбэрдей-Балъкъэрым и Парламентым и депутат Къардэн Мурадинрэ, жэпуэгъуэ мазэм махуэ зырыз хухахауэ, къуажэхэм дэт щэнхабзэмкIэ унэхэмрэ школхэмрэ псапащIэ зэхыхьэхэр щрагъэкIуэкI. Хэку зауэшхуэм и лъэхъэнэмрэ абы иужь ита илъэсхэмрэ зи сабиигъуэр хиубыда нэхъыжьыфIхэм ягъэва гугъуехьымрэ хьэзабымрэ зыхуэдам щIалэгъуалэр щагъэгъуазэу.
Апхуэдэ зэIущIэхэм ящыщу Аруан щIыналъэм хыхьэ Аруан къуажэм дэт ЩэнхабзэмкIэ унэм къыщызэрагъэпэщам щызэхуэсащ «Зауэм и бынхэр» жылагъуэ зэгухьэныгъэм хэтхэр, ветеранхэр, щIыпIэ администрацэм щыщхэр, школакIуэхэр, абыхэм я гъэсакIуэхэр.
Къардэн Мурадин, нэхъыжьыфIхэм защыхуигъазэм, жиIащ:
- Нобэ дыкъыщIызэхуэсар фэ фтелъа хьэзабымрэ гугъуехьымрэ дигу къэдгъэкIыжу, къытщIэхъуэ щIэблэм дерс къыхахыным папщIэщ, дэ ар зэи тщыгъупщэ мыхъун Iуэхущ фи фэм дэкIа бэлыхьыр зыхуэдизыр, фи псэ фемыблэжу фыщIэлэжьар сэбий къытщIэхъуэм и къэкIуэнум щхьэкIэщ. Узыншагъэрэ бын гуфIэгъуэрэ фыщымыщIэу фи гъащIэр Тхьэм фигъэхь, ди нэхъыжьыфIхэу фIыр зи Iэужьхэм. «Зауэм и бынхэр» псалъэхэр зытет медалхэри къыздэтхьащ фэр папщIэ. Ахэр фхэтлъхьэу фи нэгуи зедгъэужьын мурад диIэу аращ фыщIызэхуэтшэсар.
АдэкIэ утыкум къихьащ Джатокъуэ Казбек. «Фэ, нэхъыжьыфIхэм, фи гугъуехьыр зэхэзыщIыкIын ди щIалэгъуалэр Тхьэм ищI, фи пщIэмрэ фи нэмысымрэ мыкIуэду, фи сабийхэр фхуэузыншэрэ фыздэузыншэу Тхьэм фигъэпсэу!» - жиIэри, зэхыхьэм къыздахьа медалхэмрэ цIыхубзхэм папщIэ къахьа удз гъэгъахэмрэ иратащ зи сабиигъуэр зауэм хиубыда нэхъыжьыфIхэм.
НэхъыжьыфIхэм папщIэ ягъэхьэзыра концертымкIэ зэIущIэр зэхуащIыжащ.
КЪАНКЪУЛ Зазий.
