«Россети Шимал Кавказ» компанияны Къабарты-Малкъарда бёлюмюню – «Каббалкэнергону» специалистлери Басхан шахарда иги кесек электрокюч урланнганы бла байламлы шарт ачыкълагъандыла. Компаниядан билдиргенлерине кёре, бузукълукъ къурулуш цехледен биринде этилгенди. Бу шартны ала пландан тышында тинтиу рейд бардыргъан кезиуде тохташдыргъандыла.

Алай бла ол мюлкню иесине тийишли акт жазылгъанды. Сёз анда 613 минг киловатт-сагъатны юсюнден барады. Аны багъасы уа 4,7 миллион сомгъа жетеди. Энергетикле материалланы правону къоруулаучу органлагъа жибергендиле, ала ызы бла тийишли мадар этерча.

Электрокючню урлау игиге келтирмезлигин къайтарып эсгередиле компанияда. Ол къуру жууаплылыкъ бла къалмайды. Быллай затны этген кезиуде техника бузулургъа, от тюшерге, адам ачыргъа да боллукъду.

Жууаплылыкъны юсюнден айтханда уа, Административ бузукълукъланы кодексини 7.19 статьясына тийишлиликде, электрокюч ызлагъа соргъан-сурагъан этмей къошулгъанны эмда токну эсеплемей хайырланнганны 10-15 минг сом тазир сакълайды. Ол кеси да инсанлагъады. Предприятиялагъа бла организациялагъа уа ол къайда уллуду – 100-200 минг сомгъа жетеди. Къайтарып бузукълукъ этген инсан – 15-30, экинчилери уа 200-300 минг сом тёлерикдиле. Электрокючню урлагъанда бек уллу хата салынса, аны этгенни уголовный (165-чи статья) жууаплылыкъ сакъларыкъды.

Улбашланы Мурат.