Къабарты-Малкъарда "Къоркъуусуз эм тынгылы автомобиль жолла " миллет проектге кёре аслам иш бардырылады. Аны чеклеринде кёп болмай Терк районда да федерал магъаналы жолну 2 километр чакълы бирине  тынгылы ремонт этилгенди.

Сагъынылгъан объектни бирси субъектлеге баргъан  аслам транспорт  хайырланады, ол санда ауур жюк ташыгъан машинала да. Андан тышында, былайтын  темир жол да ётеди. 

Ишлени кезиуюнде  жолчула эки къат асфальт жайгъандыла, тёгерек-башны игилендиргендиле, сетьлени жангыртхандыла,  бордюрла салып айбатландыргъандыла. Къоркъуусузлукъгъа да аслам  эс бурулгъанды. Темир буруула жарашдырылгъандыла,    жорукъланы билдирген белгиле орнатылгъандыла  эм ызла да  тартылгъандыла.

Тынгылы ремонт баргъан объектледе ишлени  тынгылылыгъына ведомствону келечилери бла  бирге жамауатчыла да дайым эс бургъанлай  турадыла. Бир тюрлю кемчилик тинтилсе, созмай кетерирлерин айтдыла. Хайырланыргъа хазыр   жолла да комиссия мониторинг бардырмай ачылмайдыла.

  Терк шахарны къаты бла баргъан жол экономика эм социал жаны бла да магъаналыды. Аны таплыгъы жерлешлерибизден тышында, къоншу регионладан водительлени да болумларын игилендирирча ахшы себеплик этерикди. 

Эсге сала айтсакъ,  жолланы узунлугъу 10,5 минг километрге жетеди. Андан 700 километр федерал магъаналыдыла. Саулай алып айтханда, быйылны ахырына регион магъаналы жолланы 80 проценти мардалагъа келиширча боллукъларын да энчи белгилеп айтырчады. 

Курданланы Сулейман.