КъБР-м и Iэтащхьэ КIуэкIуэ Казбек Къэ­бэрдей-Балъкъэрым щыщ альпинисткэ Пекъу Алинэ ехъуэхъуащ Гималайхэм щыIэ Шишабангмэ (метр 8027-рэ) и щыгум зэ­рыдэкIам папщIэ. Ар дунейм тет бгы нэхъ лъагэ дыдэу 14-м ящыщщ. Пщащэр илъэсрэ ныкъуэм къриубыдэу метр мини 8 хъу бгы псоми дэкIуеящ, а зыращ Урысейм и альпинистхэм ящыщу ар зыхузэфIэкIар.

Альпинизмэм хуабжьу щагъэлъапIэ ­метр мини 8 хъу бгыхэм дэкIуеиныр. Абыхэм ящыщщ Джомолунгмэ (Эверест) - метр 8 848-рэ, Канченджангэ – 8586-рэ, Лхоцзе – 8516-рэ, Макалу – 8485-рэ, Чо-Ойю – 8201-рэ, Дхаулагири – 8167-рэ, Манаслу – 8156-рэ, Нанга-Парбат – 8126-рэ, Аннапурнэ – 8091-рэ, Шишабангмэ - 8027-рэ, Чогори – 8614-рэ, Гашербрум I – 8080-рэ, Гашербрум II – 8035-рэ, Броуд-Пик – 8051-рэ. Мы бгы псоми дэкIуеифауэ дунейм тетыр цIыху 40 къудейщ. 
«Апхуэдэ зэфIэкIрэ къарурэ, тегушхуэ­ныгъэрэ ерыщагърэ зэриIэмкIэ, гъуэгу ­нэхъ гугъур къыхихыурэ абы зэрырикIуэмкIэ, къалэн мытыншхэр зыхуигъэувыжурэ зэригъэзащIэмкIэ пщIэшхуэ къелэжь Алинэ. Пщащэм сохъуэхъу, сыт хуэдэ Iуэху кърихьэжьэми, ехъулIэныгъэкIэ зэфIигъэкIыу куэдрэ псэуну», – щетх КIуэкIуэ Казбек и телеграм-каналым.