CэмэгумкIэ къыщыщIэдзауэ: Беслъэней Кэзибан, Къул Риммэ, ШэрIужь Людэ, Бэч Зерэ, КIасэ Эллэ, Семэн Амсирэт. ЩIыбагъымкIэ къыдэтхэр: Тэрчокъуэ Юрэ, Мыз Ахьмэд.
Япэ егъэджакIуэ! Абы къыпхуищIам и мыхьэнэр, и инагъыр, сызэригугъэмкIэ, нэсу къыщыбгурыIуэр курыт ныбжьхэм унэса нэужьщ.
Псыгуэнсу къуажэм щыщ Бэч Зерэ дыщыIэщIалъхьам езыр щIалэт. Дэ, япэ классым кIуахэр, 20-м щIигъу дыхъурт. Бзылъхугъэ ныбжьыщIэр зыпэрыува лэжьыгъэр тIуащIэу гугъут: абы и пщэ къыдалъхьат урысыбзэкIэ дригъэджэн хуейуэ. А зэма-ным, 60 гъэхэм я пэщIэдзэхэм, дэ къытхэттэкъым урысыбзэ зыщIэ. Предметыр а бзэмкIэ сабийм къыгурыбгъэIуэныр егъэлеяуэ къалэнышхуэт. Ауэ апхуэдэ гугъуехьым къигъэлэнджакъым Бэчхэ я пхъур. Ар къызэрыдэгугъуар, тхэкIэ-еджэкIэ зэрыдигъэщIар, анэм хуэдэу къыттеубгъуа-уэ къызэрытхущытар, абы къыдита щIэныгъэр лъабжьэ зэрытхуэхъуар балигъыфI ухъуа нэужьщ уи акъылым къыщитIэсыр. ТIэкIу зыщIедгъэхмэ, дытехьэулеикIмэ, къытхуэткIиящ икIи къытхуэщэбащ. ЕгъэджакIуэм, нэхъыжь псоми пщIэ яхуэщIын, я жыIэм едэIуэн зэрыхуейр нэхъыбэу Зерэ дежщ къыщытщIар. Ди япэ егъэджакIуэм и адэ ПIетIро Хэку зауэшхуэм хэкIуэдащ, зыпIар и анэрщ.
Дригъаджэ къудейкIэ и къалэныр зэфIэкIауэ ибжыртэкъым Зерэ. Абы щыгъуазэ дищIырт дыкъэзыухъуреихь дунейр зыхуэдэм - нэгузыужьакIуэ дишэрт губгъуэм, мэзым.
КлассиплIкIэ Зерэ дригъэджахэм ящыщу нобэ псэущ Семэнхэ Амсирэт, Руслан, КIасэхэ Эллэ, Валерэ, ШэрIужь Людэ, Беслъэней Кэзибан, Къул Риммэ, БецIыкIу Рае, Бэч Людэ, Тэрчокъуэхэ Ритэ, Рае, Юрэ, Жыкъуэ Замирэт, Мыз Ахьмэд сымэ. Дунейм ехыжахэщ Иуанхэ Ардон, Валерэ, Лэшкэн Мухьэдин, Вэрыкъуэхэ Любэ, Iумят, Жыкъуэ Амин, Беслъэней Лидэ, Мысачэ Ленэ сымэ.
Зерэ и IэщIагъэр фIыуэ яригъэлъэгъуащ и гъэсэнхэм ящыщ зыбжанэм. НыбжьыщIих ирикIуащ егъэджакIуэм и лъагъуэм: Семэн Амсирэт, КIасэ Эллэ, ШэрIужь Людэ, Беслъэней Кэзибан, Тэрчокъуэхэ Ритэ, Юрэ сымэ. Юрэ, уеблэмэ, щеджа школым и унафэщIу лэжьащ зэманыфIкIэ
Иджыблагъэ, ЕгъэджакIуэхэм я махуэм ипэ къихуэу, «тлъагъунщ, дехъуэхъунщ» жытIэри абы иригъэджа зы гуп дыкIуат Зерэ деж. Псори зэуIу дызэрыгъэхъуфакъым: хэти ежьауэ къэтт, хэти сымаджэт, хэти а махуэм лажьэрт. И пщIан-тIэ дыщыдыхьам ди егъэджакIуэм къигуфIам щIэи гъуни иIэтэкъым - дэрэжэгъуэм зэщIищтарэ зыкъытщIимыгъэнщIу, IэплIэ къыдишэкIыу, Iэ къыддилъэу. Сыт хуэдиз дигу къэдгъэкIыжа а махуэм.
Псалъэм я нэхъ IэфIыр, щытхъум я нэхъ иныр зыхуэфащэ, фIыщIэ жыг хухэпсэну къэзылэжь цIыхущ, егъэджакIуэ нэсщ Бэч Зерэ. Абы иригъэджахэм, игъэсахэм къахэкIакъым адыгагъэ, цIыхугъэ зыхэмылъ, узыгъэукIытэн гуэр зыIэщIэщIа. Гуауэшхуэ игъэвын хуей хъуащ Зерэ - и щхьэгъусэ Мысостышхуэ Мухьэмэдрэ и щIалэ Тимуррэ мазищ фIэкIа ямызэхуакуу дунейм ехыжащ. Ауэ а гузэвэгъуэм зригъэщIыкIакъым ди ЕгъэджакIуэм. Абы и гурыфIыгъуэщ цIыху щыпкъэу игъэса и щIалэ Муратрэ дунейм ехыжа и къуэм къыщIэна щIалэмрэ.
Зерэ нобэ Псыгуэнсу къуажэм дэсщ хьэблэми жылэми пщIэ къыхуащIу, къакIуэу, къыщIэупщIэу. Илъэс 40-м щIигъукIэ школым щылэжьауэ тIысыжа нэужьи, ар Iуэхуншакъым - еджакIуэхэми, и гъунэгъу-жэрэгъухэм ящыщуи мащIэм ядэIэпыкъуа, я тхыгъэхэр зыхуей хуигъазэу!
Ди гуапэщ, Зерэ, уи щIэблэм уригушхуэу, ебгъэджахэм яфI, я цIэ дахэ зэхэпхыу, уузыншэу дунейм куэдрэ утетыну. Дэ, уэ ебгъэджахэм, укъызэрыдэгугъуар, щIэныгъэ гъуэгум дызэрытепшар дыпсэуху дигу зэрилъынур бэянщ.
МЫЗ Ахьмэд.
