Мы махуэхэм Къэбэрдей-Балъкъэр къэрал университетым щекIуэкIащ «Кавказ Ищхъэрэм узыфэ зэрыцIалэхэмкIэ щыIэ щытыкIэм теухуа Iуэхугъуэ нэхъыщхьэхэр» XI щIэныгъэ-практикэ конференцэ. Абы и лэжьыгъэм хэтащ Кавказ Ищхъэрэ, Ипщэ федеральнэ округхэм щыщ IэщIагъэлIхэр.
ЗэIущIэм щытепсэлъыхьащ COVID-19, ОРВИ, гепатит, ВИЧ узыфэ зэрыцIалэхэр зыпкърытхэр къэхутэнымкIэ, абыхэм еIэзэным и иджырей Iэмалхэм, эпидемиологие шынагъуэншагъэр къызэгъэпэщынымкIэ щыIэ хэкIыпIэхэм, сабийхэми балигъхэми ягъуэт медицинэ дэIэпыкъуныгъэр егъэфIэкIуэнымкIэ зэфIэгъэкIыпхъэхэм.
Ар екIуэкIащ УФ-м Узыншагъэр хъумэнымкIэ и министерствэм штатым хэмыт и IэщIагъэлI нэхъыщхьэ Чуланов Владимир и нэIэм щIэту. «Кавказ Ищхъэрэм узыфэ зэрыцIалэхэмкIэ щыIэ щытыкIэм теухуа Iуэхугъуэ нэхъыщхьэхэр щызэпкърах зэхыхьэр илъэс зыбжанэ хъуауэ идогъэкIуэкI. IэщIагъэлIхэм я щIэныгъэм хэгъэхъуэнымкIэ, лэжьыгъэ и пIалъэкIэ зэхъуэжынымкIэ ар Iуэху щхьэпэщ. ЗэIущIэм къыщаIэт упщIэ куэдым дохутырхэр хуегъэхьэзыр узы-фэ зэрыцIалэхэм къашэ шынагъуэхэм зэрапэщIэтынум. Урысейм и Ипщэ щIыналъэм узыфэ зэрыцIалэхэр нэхъыбэрэ къыщохъей, а щIыпIэм цIыху куэд къакIуэу зэрыщытым къыхэкIыу. Медицинэм зыужьыныгъэ хъарзынэхэр игъуэтащ, а узыфэхэм дазэрыпэщIэтын IэзэкIэщIэхэр щыIэщ, абы и лъэныкъуэкIэ диIэщ IэщIагъэлIхэм дазэрыдэгуэшэн щIэныгъэрэ Iуэху бгъэдыхьэкIэщIэрэ», - жиIащ абы.
Дохутырхэм утыку кърахьащ узыфэхэм зэрапэ-щIэт Iэмалхэр, ирагъэкIуэкIа лабораторэ къэхутэныгъэхэм япкъ иткIэ нэхъ щхьэпэу къалъыта IэзэкIэхэм, хущхъуэхэм я гугъу ящIащ.
КъБР-м узыншагъэр хъумэнымкIэ и министр Къалэбатэ Рустам жиIащ IэщIагъэлIхэр зэхуэсу я еплъыкIэхэр къызэрагъэлъагъуэм мыхьэнэшхуэ зэриIэр, апхуэдэ Iуэхухэм хэт дэтхэнэми абы и къэухьым зезыгъэужьын, и зэфIэкIым хэзыгъэхъуэн щIэныгъэ къызэрыхихыр, я лэжьыгъэм ар щхьэпэ къазэрыщыхуэхъужыр.
ЩхьэщэмыщI Изэ.
