«Рейтинг» РИА-м иригъэкIуэкIа къэпщытэныгъэхэм къызэрагъэлъэгъуамкIэ, УФ-м и къалэ нэхъ инхэм щыпсэухэм я улахуэм и инагъымкIэ Налшык иужь дыдэ увыпIэм щытщ. Апхуэдэщ Грознэ, Элиста, Владикавказ, Черкесск, Мейкъуапэ къалэхэри. 
Иджырей рейтингыр зэхагъэуващ муниципалитетхэм я статистикэмрэ Росстатым къигъэлъэгъуа хъыбархэмрэ ятещIыхьауэ икIи абы хыхьащ къэралым и къали I00, щIыналъэхэм я къалащхьэхэри яхэту. 
Рейтингыр щызэхагъэувэм къалъытащ ику иту ят улахуэмрэ я хэхъуэм хэкI налогымрэ хэмыту, абыкIэ къыпхуэщэхуну, потребительскэ наборкIэ зэджэ, цIыхур Iэмал имыIэу зыхуэныкъуэ ерыскъы, хьэпшып сыт хуэдэхэм, Iуэхутхьэбзэхэм я уасэхэмрэ зэхуэгъэкIуауэ. 
АтIэ, къэпщытэныгъэхэм къызэрагъэлъэгъуамкIэ, Налшык къалэм ику иту щат улахуэмкIэ апхуэдэ потребительскэ набори 2,2-рэ къыпхуэщэхуну аращ. Ар хуэдищкIэ нэхъ мащIэщ рейтингым япэ увыпIэр щызыIыгъ Новый Уренгой къалэм къыщалэжьым нэхърэ.
Налшык къалэм ику иту къыщахь улахуэр сом мин 44,7-рэ хъууэ аращ. АтIэми, нэгъабэрей бжыгъэхэм елъытауэ абы процент I7-кIэ хэхъуащ. Ставрополь къалэм а пIалъэм къриубыдэу процент 27-кIэ щыдрагъэкIуеящ.
Урысей Ипщэм и къалэхэм ящыщу рейтингым ищхьэмкIэ щыIэхэм яхэтщ Краснодаррэ (40-нэ увыпIэ) Дон Iус Ростоврэ (47-нэ увыпIэ).
Абы нэмыщI ирагъэкIуэкIа нэгъуэщI къэпщытэныгъэхэм наIуэ къызэращIамкIэ, щIыналъэхэм я IэнатIэхэм щат улахуэхэм я куэдагъымкIэ, Элиста къалэм рейтингым яужь дыдэ увыпIэр къыщылъысащ. Мы къалэм псом нэхърэ нэхъыбэ улахуэ къыщызыхьхэр къэрал къулыкъущIэхэрщ. Къалмыкъым и къалащхьэм къыкIэлъокIуэ Мейкъуапэ, Владикавказ, Черкесск, Магас къалэхэр. Мыбыхэми я цIыхухэм я улахуэхэм я куэдагъыр къыдэзыщIейр къэралым къулыкъу хуэзыщIэхэрщ.
ХЬЭЩЫКЪУЕЙ Олег.