Москвада Странноприимный юй (шёндю Склифософский атлы институт) уллу сюймекликни белгисича ишленнгенди. Граф Н.П. Шереметьев Прасковья Ковалёваны сейирлик ауазы ючюн гитчелигинден окъуна сюйгенди. Крепостной театр къуралгъанда, Прасковья аны солисткасы, аны бла бирге уа графны фавориткасы да болады, анга жаш да табады. Актриса жандауурлукъ бла бек кюрешгенди, жарлыла аслам жыйылгъан Сухаревкагъа барып, алагъа ахча узата тургъанды. Шереметьев, аны тилегине бойсуна, алайда жолоучулагъа, къартлагъа, къыяулулагъа, багъылыргъа ахчалары болмагъан адамлагъа болушурча Странноприимный юй ишлетгенди. Алгъадан ол уллу мекям тюйюл эди, проектин да архитектор Е. Назаров жарашдыргъан эди.

Сабий тапханлай, жыйырма кюнден графиня ёпке ауруудан (чахотха) ёледи. Бу бушуугъа тёзалмай, эри танышы, белгили архитектор Джакомо Кваренгини ишленип бошала тургъан юйню жангыртыргъа чакъырады. Кваренги больницагъа колоннала да салып, аны ариу къалагъа ушатады. Аш хазырлагъан жери, тюз да патчахныкъыча,  алтын суу ичирилген накъышла бла жасалады, Троицкая церковь деген жери мермер эм урал ташла бла ишленеди. Алай бла ол сюймекликге эсгертме-къала болады.   

Кульчаланы Зульфия.