Къэрал хабзэм къызэригъэувым ипкъ иткIэ, КъБР-м и Iэтащхьэу хаха КIуэкIуэ Казбек и ­къулыкъум зэ­рыпэрыувэм теухуа дауэдапщэр ­КъБР-м и Правитель­ствэм и Унэм щекIуэкIащ. А зэIущIэм хэтащ УФ-м   и Президентым и полномочнэ лIы­кIуэу Кавказ Ищхъэрэ федеральнэ щIыналъэм щыIэм и къуэдзэ Ку­ренной Александр, Адыгэ Республикэм и Iэтащхьэ КъумпIыл Мурат, Дагъыстэн Республикэм и Лъэпкъ Зэхуэсым и УнафэщI Аскендеров ­Заур, Къэ­рэшей-Шэрджэс Респуб­ликэм и тхьэмадэ Темрезов Рашид, Осетие Ищхъэрэ - Аланием и Iэтащхьэ ­Меняйло Сергей, Шэшэн Респуб­ликэм и Парламентым и тхьэмадэ ­Жамалдаев Шаид, Ставрополь крайм и губернатор Владимиров ­Вла­димир. 

УФ-м и Президентым и Админист­рацэм, федеральнэ министерст­вэ­хэмрэ ведомствэхэмрэ я лIыкIуэхэр, УФ-м и Къэрал Думэм и депутатхэр, Федеральнэ Зэхуэсым и сенаторхэр, КъБР-м и Конституцэ, Арбитраж судхэм, Суд Нэхъыщхьэм я унафэщIхэр, депутатхэр, министрхэр, нэгъуэщI къу­лыкъущIэхэр, жылагъуэр хэтащ мы Iуэхум. ЗэIущIэр къыщызэIуихым ­КъБР-м и Парламентым и УнафэщI Егоровэ Татьянэ къеджащ КIуэкIуэ Казбек Къэбэрдей-Балъкъэр Респуб­ликэм и Iэтащхьэу зэрыхахамкIэ Парламентым и Унафэм. 
- 2021 гъэм дыгъэгъазэм и 21-м ­къы­дэкIа «Урысей Федерацэм и субъектхэм я къэрал властым и лIыкIуэ (законхэр къыдэ­зыгъэкI), гъэзэ­щIа­кIуэ органхэр къызэгъэпэщынымкIэ псоми яхуэгъэза хабзэхэм ятеухуауэ» Федеральнэ законым и 20, ­23-нэ статьяхэм, Къэбэрдей­Балъкъэрым и Конститутцэм и 79-нэ статьям, 2014 гъэм и мэлыжьыхьым и 23 гъэм къыдэкIа «Къэбэрдей-Балъкъэр Республикэм и Iэтащхьэр Къэбэрдей-Балъкъэр Респуб­ликэм и Парламентым и депутатхэм зэрыхах щIыкIэм и IуэхукIэ» республикэ законым и 3-нэ статьям къызэрагъэувым тету, КъБР-м и Парламентым унафэ ещI, щэхуу екIуэкIа IэIэтым кърикIуахэмкIэ, КIуэкIуэ Казбек Валерий и къуэр илъэситхукIэ ­КъБР-м и Iэтащхьэу хахыну, - жиIащ Егоровэм икIи дыщIи­гъуащ дэфтэрым а махуэм щыщIэдза­-уэ къару зэригъуэтыр, ар Урысей Фе­де­рацэм и Президентым зэ­ры­хуа­гъэ­хьынур. 
Абы иужькIэ, КъБР-м и Iэтащхьэм и Iэр КъБР-м и Конституцэ тхылъым трилъ­хьэ­ри, тхьэ иIуащ зыпэрагъэува ­IэнатIэм пэ­рытыху цIыхум и хуитыныгъэр зэрихъумэнум, УФ-м, КъБР-м я Конституцэхэм къагъэувхэр зэригъэ­зэщIэнум, республикэм и къэралы­гъуэр, шынагъуэншагъэр къызэ­ры­зэ­ригъэпэщынум, Къэбэрдей-Балъкъэр Республикэм и цIыхухэм пэжу зэрахуэлэжьэнум теухуауэ. 
ЗэIущIэм къыщеджащ УФ-м и Феде­ральнэ Зэхуэсым ФедерацэмкIэ и Советым и УнафэщI Матвиенкэ Валентинэ, ­УФ-м и Правительствэм и УнафэщI Мишустин Михаил сымэ къагъэхьа телеграммэхэм. 

«ПщIэ зыхуэсщI Казбек Валерий и къуэ! Сынохъуэхъу Къэбэрдей-Балъкъэрым и Iэтащхьэу иджы­ри зы пIалъэкIэ узэрыхахыжамкIэ. Уэ уи IэщIагъэм фIыуэ зэрыхэпщIыкIым, узэпэрыт ­къулыкъум и пIалъэр зэрыпщIэм, уи мурадхэр зыIэрыбгъэхьэфу узэ­рыщытым къыхэкIкIэ, Къэбэрдей-Балъкъэрым и экономикэм, щыIэкIэ-псэукIэм зэпIэзэрыту зиужь хъуащ, цIыхухэм я псэукIэр нэрылъагъуу ефIэкIуащ. Си фIэщ мэхъу УФ-м и Федеральнэ Зэхуэсым ФедерацэмкIэ и Советымрэ КъБР-м и къэрал къулы­къущIапIэхэмрэ зэдэлэжьамэ, дя­пэкIи IуэхуфI куэд къызэры­пэкIуэнур. Уи къэрал къулыкъу лъагэм ехъулIэныгъэхэр ущиIэну сыно­хъуэхъу», - щыжеIэ Матвиенкэ Валентинэ телеграммэм. 
УФ-м и Правительствэм и Уна­фэщI Мишустин Михаил къыхегъэщ: «IэIэтым кърикIуахэр иджы­ри зэ щыхьэт техъуащ уи IэнатIэм узэрыхуэIэижьым, къалэн гугъухэм псынщIэу хэкIыпIэ къа­зэрыхуэбгъуэтыфым, щIыналъэм зиужьынымкIэ, цIыхухэм я псэукIэр ефIэкIуэнымкIэ лэжьыгъэшхуэ зэрызэфIэпхым. Хьэлы­фIу уэ пхэлъымрэ уиIэ зэфIэ­кIымрэ Къэбэрдей-Балъкъэрми къэрал псоми иджыри фIы куэд къызэрыхуахьынум шэч къытесхьэркъым. Сынохъуэхъу узыншагъэ быдэрэ ехъулIэныгъэш­хуэхэмрэ уиIэну!» 
Куренной Александр къеджащ УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэ Чайкэ Юрий зэрызыкъыхуигъазэ псалъэм. «Сынохъуэхъу, Казбек Валерий и къуэ, КъБР-м и Iэтащхьэу узэрыхахамкIэ. Уэ дзы­хьыш­хуэ къыпхуащIащ УФ-м и Президентымрэ КъБР-м и Парламентым и депутатхэмрэ. Абы, дауи, лъабжьэ хуэхъуар егупсысауэ, зэгъэзэхуауэ ебгъэкIуэкIа лэжьыгъэрщ, псэукIэм, экономикэм, жылагъуэ, политикэ Iуэхухэм цIыхухэм ягу дыхьэу узэ­ры­хэлIыфIыхьарщ. Илъэсихым ­къриубыдэу фэ куэдым фыхунэсащ, промышленностым, мэкъу­мэш, ухуэныгъэ, туризм IэнатIэхэм зыужьыныгъэ нэрылъа­гъу­­хэр ягъуэтащ, дяпэкIи ап­хуэдэу жыджэру улэжьэну ди гуапэщ». 
Адыгэ Республикэм и Iэтащхьэ КъумпIыл Мурат къыщыпсалъэм жиIащ КIуэкIуэ Казбек щы­лэжьа пIалъэр тыншу щымытами, зэманым къыхуигъэув къалэн гугъу псоми зэрыпэлъэщыр. 
- Уэ сытым дежи къыпкъуэтщ Къэбэрдей-Балъкъэр Республикэм щыпсэу цIыхубэр, къыбдоIэпыкъу федеральнэ центрыр, апхуэдэуи Адыгейм щыпсэухэр гукIи псэкIи уи телъхьэщ. Узэ­рылэжьа пIалъэм къриубыдэу мы хэгъэгум дахэу зихъуэжащ, IэнатIэ зэмылIэужьыгъуэхэм ехъу­лIэныгъэшхуэхэр щызыIэригъэ­хьащ, дяпэкIи апхуэдэ лъэба­къуэ­щIэхэм къыхэвгъахъуэу зэре­кIуэкIынум шэч къытесхьэркъым. 
Уэ уи фIыгъэкIэ иужьрей илъэс­хэм адыгэ зэрыс республикэхэм я зэхуаку дэлъ къуэш зэпыщIэныгъэхэр нэхъри дгъэбыдащ. Дэ дызэгурыIуэу ди лъэпкъ Iуэхухэр догъэкIуатэ, зэгъусэу долэжь ди цIыхухэм я псэукIэр нэхъыфI щIыным. АдэкIи къыпытщэнущ дэт­хэнэ лъэпкъым дежкIи щхьэ­пэу Президентым къытхуигъэув къалэнхэр зэфIэхыным, - жиIащ КъумпIылым.
Адыгейм и Iэтащхьэм и къэп­сэлъэныгъэр адыгэбзэкIэ иухыжащ: «Мамырыгъэ фиIэу, фи Iуэхухэр ефIакIуэу, фызыхуей псо­ми фи Iэр нэсу куэдрэ Тхьэм фыщигъэIэ!» 
Къэрэшей-Шэрджэс Республикэм и тхьэмадэ Темрезов Рашид жиIащ КIуэкIуэ Казбек къыдэ­лажьэ гупым яхуигъэув къалэнхэр зыхуэдэр фIыуэ зэрищIэр, ар зэрахузэфIэкIынури зэры­нэры­лъагъур. Апхуэдэуи дыщIигъуащ дзэ Iуэху хэхам щыIэ щIалэхэм Iэтащхьэм гулъытэшхуэ зэрахуи­щIыр, зэрахыхьэр, зэрадэIэпы­къур куэд зэриуасэр, КIуэкIуэм зыхуигъэувыж мурад псори зэ­рызригъэхъулIэнур и фIэщ зэрыхъур. 
- Кавказ Ищхъэрэ федеральнэ щIыналъэм хиубыдэ хэгъэгухэр ижь-ижьыж лъандэрэ зэгуры­Iуэу, зэдэIуэжу, лъытэныгъэрэ ­гуапагъэрэ я зэхуаку дэлъу къызэдогъуэгурыкIуэ. Дэ а щапхъэм дытету дызэрызэдэлажьэр, ды­зэ­рызэхущытыр, шэч хэмылъу, ди IэнатIэми къыщытхуосэбэп, - жиIащ Осетие Ищхъэрэ - Аланием и Iэтащхьэ Меняйло Сергей къыщыпсалъэм. 
Шэшэн Республикэм и Парламентым и тхьэмадэ Жамалдаев Шаид къеджащ ШР-м и Iэтащхьэ Кадыров Рамзан къигъэхьа ­хъуэхъу тхыгъэм. Шэшэн Iэтащхьэми къыхигъэбелджылыкIащ КIуэ­кIуэр етIуанэ пIалъэкIэ зэрыхахыжар Урысейми Къэбэрдей-Балъкъэрми я зыужьыныгъэм жэуап­лыныгъэ ин пылъу зэрыхуэ­лажьэм къызэрыпэкIуар, абы и Iэзагъымрэ зэфIэкIымрэ иджы­ри IуэхуфI куэд къазэрыхуихьынур къыхигъэщащ. 
Гум къыбгъэдэкIыу къэпсэ­лъащ Ставрополь крайм и губернатор Владимиров Владимир.
- ЕхъулIэныгъэшхуэхэр уиIащ мы илъэсихым. Сэ куэд жысIэнукъым. ФIыщIэ пхуэсщIыну сы­хуейщ си сабиигъуэр щыкIуа Прох­ладнэ къалэм щхьэкIэ. Гъуэгухэр щевгъэфIэкIуащ,   ЩэнхабзэмкIэ унэ дэфщIыхьащ, псэу­­­кIэм зыщиужьащ. МашиниплI щызэблэжыфу фщIа гъуэгухэм щхьэкIэ фIыщIэ ин ­фхузощI. Iуащхьэмахуэ лъапэ зэ­рызев­гъэужьым щхьэкIэ щхьэ­хуэу сыф­­хуэарэзыщ сэри, си уна­гъуэри, ставропольдэсхэри. Ахэр къэ­кIуэну, зыщагъэпсэхуну яфIэфIщ фи республикэм. 
Езы КIуэкIуэр къыщыпсалъэм псом япэу фыщIэ хуищIащ УФ-м и Президент Путин Владимир дзыхь къыхуищIу IэнатIэр иджы­ри зэ къызэрыхуигъэлъэгъуам пап­щIэ, апхуэдэуи депутатхэмрэ Къэбэрдей-Балъкъэрым и цIыху­хэмрэ псалъэ гуапэкIэ захуигъэзащ, ахэр къызэрыщыгугъ псори зэфIигъэкIын папщIэ и къаруи, щIэныгъи, зэфIэкIи зэры­щы­мысхьынур, хуей хъумэ, и узыншагъэри хилъхьэну зэры­хьэзырыр жиIащ КIуэкIуэ Казбек. 

НэщIэпыджэ Замирэ.