КъБР-м и Iэтащхьэ КIуэкIуэ Казбек щIыналъэм и зыужьыныгъэм хэлъхьэныгъэфI хуэ­зыщIа, зи IэнатIэм ехъулIэныгъэ щызиIэ цIыху гуащIафIэхэм щIыхьыцIэхэмрэ къэрал дамыгъэ лъапIэхэмрэ яритыжащ Къэбэрдей-Балъкъэрым и Къэралыгъуэм и махуэм ирихьэлIэу. 

КIуэкIуэ Казбек ягъэлъапIэхэм защыхуи­гъазэм къыхигъэщащ махуэшхуэр Къэбэрдей-Балъкъэрым и тхыдэм, и къэралыгъуэм и зыужьыныгъэм и дамыгъэ зэрыхъуар. УФ-м и Президентым цIыхухэр хъумэным и IуэхукIэ  къахуигъэува къалэнхэр ягъэзэщIэнымкIэ псом хуэмыдэу узыншагъэр хъумэнымкIэ IэнатIэм пэрытхэм куэд зэрелъытар икIи ахэр а Iуэхум зэ­ры­пэлъэщыр, цIыху гъащIэм и кIыхьагъым, ­къалъ­ху­­хэм я бжыгъэм зэрыхэхъуэр, лIэныгъэр нэхъ мащIэ зэрыхъуар жиIащ. Физкультурэмрэ ­спортымрэ я лэжьакIуэхэм цIыхухэм я узыншагъэр зэрагъэбыдэр, егъэджакIуэхэм щIэблэм щIэныгъэрэ гъэсэныгъэрэ зэрыратыр, Хэку ­лъагъуныгъэм зэрыщIапIыкIыр зэрыуасэншэм, ухуакIуэхэм, нэгъуэщI унэтIыныгъэхэм пэрыт IэщIагъэлIхэм республикэр зэрырагъэфIакIуэм къытеувыIа нэужь, щIыналъэм и Iэтащхьэм пщIэрэ щытхъурэ, жэуаплыныгъэ яIэу зи IэнатIэ езыхьэкIхэм ящыщу зэIущIэ гуапэм ирагъэблэгъахэм яритыжащ хуагъэфэща щIыхь дамыгъэхэр.
- Къэралыгъуэ зиIэ хъуа, зи лъапIэныгъэхэмрэ къалэнхэмрэ зэрызэхуэдэм нэхъри зэкъуигъэува адыгэхэмрэ балъкъэрхэмрэ хэлъхьэныгъэфI хуащIащ щIыналъэм и экономикэ, социальнэ IэнатIэхэр къэIэтыным, щэнхабзэм, нэгъуэщI унэтIыныгъэхэм зегъэужьыным, лъэпкъ хабзэхэр хъумэным. БлэкIа илъэсипщIхэм республикэм и унэтIыныгъэ псоми цIыхубэм ехъулIэ­ныгъэфIхэр щызыIэрагъэхьащ, - жиIащ КIуэкIуэ Казбек. - Къэбэрдей-Балъкъэрым исхэр иро­гуш­хуэ япэ ита нэхъыжьыфIхэм я зэфIэкIхэм. Ди щIыналъэр нэгъуэщI лъэпкъхэм къахэкIа куэдым псэупIэ яхуэхъуащ. Ахэр зэкъуегъэувэ Къэбэрдей-Балъкъэрымрэ Урысеймрэ егъэ­фIэкIуэным хэлъхьэныгъэ хуэщIыным. Ди псалъэ гуапэхэр яхуэгъэзащ хэкум, къэралым еш зымыщIэу псэ хьэлэлкIэ хуэлажьэхэм. Апхуэдэу фIыщIэ хэха яхуэфащэщ дзэ Iуэху хэхам лIы­хъужьыгъэ къэзыгъэлъагъуэу щыIэ, Урысейм къулыкъу хуэзыщIэ щIалэхэм. Абыхэм я нэхъыжьхэм, унагъуэхэм пщIэ яхудощI.
Зэхыхьэм хэтащ КъБР-м и Парламентым и Iэтащхьэ Егоровэ Татьянэ, КъБР-м и Правительствэм и УнафэщI Мусуков Алий, УФ-м и Президентым и полномочнэ лIыкIуэу КИФЩI-м щыIэм и Аппаратым КъБР-м къегъэщIылIа и федеральнэ инспектор нэхъыщхьэ Васильченкэ Дмитрий, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд. 
ТЕКIУЖЬ Заретэ