ШыщхьэуIум и 29-м «КьБР-м­ и муниципальнэ щIы­на­лъэ­хэм я совет» зэгухьэныгъэм ­(КъБР-м и ­АСМО) и прав­ленэм и унафэщI Пэнагуэ Максим я зи чэзу зэIущIэр ­КъБР-м и Правительствэм щригъэкIуэкIащ. Абы хэтащ КъБР-м и Iэтащхьэм и Администрацэм политикэ кIуэцI Iуэхухэмрэ щIы­пIэ унафэр зехьэнымкIэ и управленэм и чэнджэщэгъу Храмцов Алексей, щIыпIэ администрацэхэм я Iэтащ­хьэхэр, муниципальнэ район­хэмрэ къалэхэмрэ я щIыпIэ унафэр зехьэнымкIэ я советхэм я унафэщIхэм я ­къуэдзэхэр.

ЗэIущIэм IуэхугъуитIым щы­­хэплъащ. КъБР-м ЩэнхабзэмкIэ и министерствэм ЦIыхубэ творчествэмрэ культ­просвет лэжьыгъэмкIэ и Къэ­бэрдей-Балъкъэр методическэ центрым и унафэщI Жы­лэ Анатолэ тепсэлъыхьащ лъэпкъ гъуазджэмрэ IэпщIэ­лъап­щIагъэмрэ республикэм зэрыщахъумэну Iэмалхэм. Абы жиIащ мы зэманым «ЦIыхубэ IэпщIэлъапщIагъэм теухуауэ» КъБР-м и Законым тету, лъэпкъ щIэинхэр къэгъэщIэрэщIэжынымрэ абыхэм зегъэужьынымрэ ахэр зэрелэжьыр. КъищынэмыщIауэ, гулъытэшхуэ хуащI лъэпкъ IэпщIэлъапщIагъэм цIыхухэр дегъэхьэхыжыным, щIыналъэм зыгъэпсэхуакIуэ къакIуэхэм ди щэнхабзэр ­ирагъэцIыхуным. 
- Ди мурадхэр къыдэхъу­лIэн папщIэ, республикэм и къалэ, къуажэ къэс лъэпкъ IэщIагъэхэм щыхуа­гъасэ унэхэр е гупжьейхэр къыщызэгъэпэщын, абыхэм щылэжьэну IэщIагъэлIхэр ­къешэлIэн хуейщ. Курыт школ­хэм щеджэхэм я лэжьыгъэ дерсхэм хыхьэу, лъэпкъ фащэ зэрадым, щIакIуэ зэращIым, дыщэкIым, хэдыкIым, пхъэм къыхэбзыкIыным, ятIа­­гъуэм зэрелэжьым, цы зэI­рызэIуащэм ахэр щыхагъэгъуазэу щIыпхъэщ, - жиIащ Жылэ Анатолэ. - Апхуэдэуи IэпщIэлъапщIэхэм сату щапIэхэр (павильонхэр) яIэн ­хуейщ, я IэдакъэщIэкIхэр ягъэ­лъэ­гъуэ­­фын, ящэн хуэдэу. Ап­­хуэдэхэр къыщызэIухыпхъэщ, псалъэм папщIэ, зы­гъэп­сэхуакIуэхэр нэхъыбэу здэ­­кIуэ щIыпIэхэм: Джэдмышх псыкъелъэхэм, Зэнзэныпсхэм я хуейм, Шэдхъу­рей гуэлым, Джэдыкъуэ, Ау­шы­джэр псы хуабэхэм, Гуэл щхъуантIэхэм, Iуащхьэмахуэ лъапэ хуэзэу. КъБР-м и Правительствэм зыхуэдгъэзэну дыхуейт лъэпкъ IэпщIэлъап­щIэхэм илъэс къэс ахъшэ ­саугъэткIэ зыщIагъакъуэу щIы­ным хэплъэну.
Бахъсэн къалэ округым и Iэтащхьэм и къуэдзэ Къармэ Залинэ зэIущIэм хэтахэр щигъэгъуэзащ КъБР-м и Парламентым и VII зэхуэсым хэтыну депутатхэм я хэхыныгъэхэм зэрызыхуагъэхьэзырым. 

БАГЪЭТЫР Луизэ.