Урысей Федерацэм и еджа­кIуэхэм дзюдомкIэ я 7-нэ Гъэмахуэ спартакиадэу иджыблагъэ Армавир къалэм щекIуэкIам и иужьрей махуэм Хъуран Каринэ Къэ­бэрдей-Балъкърым иджы­ри зы медаль къыхуихьащ.

Килограмм 48-м щыбанэ хъыджэбз цIыкIум кIэух зэхьэзэхуэм и Iыхьэ ныкъуэм къыщыпэщIэтащ иужькIэ чем­пион хъуа Карабихинэ Екатеринэ, ауэ, ди жагъуэ зэрыхъущи, къытекIуащ. ИужькIэ, финал «цIыкIум» ягъэкIуа нэужь, ар пэщIэ­хуащ Мэзкуу къалэм щыщ Адамайкинэ Аринэ. Ауэ мыбдежым, и хьэрхуэрэгъум и IэзагъкIэ ефIэкIыу, «иппонкIэ» зэIущIэр къыфIихьри, спартакиадэм и домбеякъ медалыр зыIэригъэхьащ.
Псори зэхэту Каринэ зэIущIибл иригъэкIуэкIати, абы щыщу хым зэIущIэм хухаха зэманхэр и кIэм нимыгъэсу щытекIуащ.
Фигу къэдгъэкIыжынщи, Хъуран Каринэ нэмыщI спартакиадэм и медалхэр япэ махуэхэм къахьащ Джэданэ Алинэ (дыщэ), Унэж Темырлан (дыжьын), БищIо Атхъанрэ Борэн Иналрэ (домбе­якъ) сымэ.
Мы Гъэмахуэ спартакиадэм зыкъыщагъэлъэгъуащ къэралым и щIыналъэ куэдым я спортсмену, щIалэхэри хъыджэбзхэри зэхэту, 700-м щIигъу, я ныбжькIэ илъэс 18-м щIимыгъуауэ.
ТОМЭКЪУЭ  Алыдж.