Юйде ремонт этгенден сора, къадар кир-кипчик къалады. Дагъыда эски мебельни, бытовой техниканы да атып къойгъан болмаса, башха затха хайырланыу тёре жокъду. Быллай затланы къайры элтирге керекди, къайры атаргъа?

Эски мебель эмда техника

Ала ууакъ затла тюйюлдюле, алай законда айтылгъаныча, ала да коммунал кир-кипчикге саналадыла. Быланы башха кир-кипчикни жыйгъан орунлагъа салыргъа жарамайды, алагъа энчи контейнерле неда тёгереклери бегитилген жерле болуучудула. Аланы уа хар арбазда орнатмайдыла неда къурамайдыла, алай бек узакъгъа да элтмейдиле. Мебельни, техниканы, башха затны узунлугъу жарым метрден артыкъ тюйюл эсе, аланы быллай контейнерледе неда жерледе къояргъа тийишлиди.

Техниканы къурутуу

Жумушха жууаплы кёзден къараргъа сюе эсегиз, эски техниканы кир-кипчик орунну къатында къоймай (закон бла алай этерге жарагъанлыкъгъа да), тийишли компаниялагъа сёлеширге боллукъсуз. Ала келип техниканы алып кетерикдиле, ызы бла аны къоркъуусузлу къурутхан организациягъа берликдиле.

Къурулушдан къалгъан-къулгъанла

Аны да эки тюрлюсю болуучуду. Кезиулю ремонтдан сора къалгъан ууакъ затланы башха кир-кипчик бла атаргъа жарайды. Тынгылы жангыртыу ишледен неда къурулушдан къалгъан-къулгъанланы уа угъай – ала бытовой кир-кипчикге саналмайдыла. Аланы ташып кетерир ючюн, кесигиз амал табаргъа керексиз: регион оператор бла келиширге неда энчи улоу табып, анга жюклеп, тийишли жерде тёгерге.

Къабарты-Малкъарда кир-кипчикни ташыу бла «Экологистика» организация кюрешеди. Аны келечиси Саида Касимова билдиргеннге кёре, шёндю алада быллай къалгъан-къулгъанланы ташып чыгъарыргъа онглары жокъду: «Улоуланы бир кесеги ремонтдадыла, башхалары уа жаланда коммунал кир-кипчикни ташыргъа жарайдыла. Къурулуш материалланы тёрели контейнерлеге тёгерге, аланы къатларында да къояргъа эркинлик берилмейди, бизни организация аллай затланы ташып кетерирге борчлу тюйюлдю. Аны ючюн, уллу кёллюлюк этмей, ауур жюкле ташыгъан улоу табып, аны иеси бла келишип, ол затланы Урванда полигоннга элтип тёгюгюз».

Быллай къалгъан-къулгъанланы къайда болса да бошуна тёгюп кетерге жарамайды, ол айып ишди, аны ючюн тазир да салынады.

Улбашланы Мурат хазырлагъанды.