Кулиев Къайсын и цIэр зезыхьэ ­Балъкъэр къэрал драмэ театрым фокIадэм и 27-м пресс-конференц щекIуэкIащ. Ар теухуауэ щытащ УФ-м ЩэнхабзэмкIэ и министерствэм къы­зэригъэпэща «Большие гастроли» урысейпсо Iуэхум. Абы хыхьэу Налшык и хьэщIэщ Алтай Республикэм ­Кучияк Павел и цIэр зезыхьэ и Лъэпкъ драмэ театрым и артистхэр.

Пресс-конференцЫм хэтащ Балъкъэр къэрал драмэ театрым и унафэщI Жангуразов Мэжид, а театрым и актёр Гиляхов Мурат, Кучияк Павел и цIэр зезыхьэ Лъэпкъ драмэ театрым и артистхэр: театрым и унафэщI Пешперовэ Светланэ, режиссёр нэхъыщхьэ, Алтай Республикэм гъуазджэхэмкIэ щIыхь зиIэ и лэжьакIуэ Иришевэ Эммэ, актёр, тхакIуэ, усакIуэ, зэдзэкIакIуэ, Алтай Республикэм щэнхабзэмкIэ щIыхь зиIэ и лэжьакIуэ Багыров Николай. 
Зэхыхьэм хэтхэм псом япэу фIыщIэ ­хуащIащ мы Iуэхур зи жэрдэм «Рос­концерт»-м, Урысей Федерацэм, Алтай, Къэбэрдей-Балъкъэр республикэхэм щэнхабзэмкIэ я министерствэхэм, нэ­гъуэщI щIыналъэхэм я лэ­жьыгъэхэр ­щагъэлъэгъуэну, я театр гъуаз­джэмрэ щэнхабзэмкIэ зэхъуэжэну Iэмал къы­зэрыратам папщIэ. 
Фигу къэдгъэкIыжынщи, Балъкъэр драмэ театрым и артистхэм фокIадэм и пэхэм Горно-Алтайск зыкъыщагъэлъэ­гъуащ. Иджы а щIыналъэм и артист пажэхэр ди хьэщIэщ. КъыжыIапхъэщ, Алтайск щыщ артистхэр мы Iуэхум илъэс зыбжанэ хъуауэ зэрыхэтыр. ХьэщIэхэм къашащ Айтматов Чингиз «И дольше века длится день» и романым къытращIыкIа «Колыбель» спектаклыр. НыбжьыщIэхэм папщIэ ягъэлъэгъуащ «Сказка о золотой рыбке» таурыхъыр.
Жангуразов Мэжид къызэхуэсахэм яхутепсэлъыхьащ «Большие гастроли» Iуэ­хум и фIыгъэкIэ Алтай Республикэм я ­театрыр зэрыщыIам, абы щагъэлъэгъуа лэжьыгъэхэм. 
Пешперовэ Светланэрэ Иришевэ Эммэрэ къытеувыIащ Кучияк Павел и цIэр зезыхьэ Лъэпкъ драмэ театрым и лэ­жьыгъэхэм, я репертуарым щыщу Налшык къаша спектаклхэм. 
Багыров Николай тепсэлъыхьащ балъкъэр, алтай тхакIуэхэу Кулиев Къ., Ука­-чин Б., Бедюров Б., Тепуков К., нэ­гъуэщI­хэми яку дэлъа зэныбжьэгъугъэм. 
Балъкъэр театрым и артист Гиляхов Мурат театритIым я унафэщIхэм фIыщIэ яхуищIащ Iуэху щхьэпэр къызэрызэрагъэпэщам, я Iэзагъэмрэ зэфIэкIымрэ хагъэхъуэну Iэмал къызэрыратам папщIэ. 
Пресс-конференцым хэтахэр лъэпкъ драмэ театрым и Iуэху зэIумыбзхэм теп­сэлъыхьащ, лъэпкъ драматургием теу­хуа я еплъыкIэхэр къагъэлъэгъуащ. Лъэ­ныкъуэхэр зэгурыIуащ дяпэкIи зэдэ­лэ­жьэну, зэкIэлъыкIуэну, я зэныбжьэгъугъэм зрагъэубгъуну.
ТЕКIУЖЬ  Заретэ. 
Сурэтыр Къарей Элинэ трихащ.