Нальчикде от ёчюлтюу-къутхарыу спортдан республиканы биринчилиги бардырылгъанды. Анга абаданла, окъуучула да къатышадыла.

Эришиуню къууанчлы халда ачылыууна къуллукъчула, ветеранла да келгендиле. МЧС-ни регионда Баш управлениясыны таматасы Михаил Надёжин белгилегенича, от ёчюлтюу-къутхарыу спорт бу иш къаллай бирге къыйын болгъанын, аны сайлагъанла дайымда хазырлылыкъда турургъа керек болгъанларын кёргюзтеди. Сынаула жаш адамлагъа сейир кёрюнюрюкдюле, аланы хайырындан ала сыйлы усталыкъны энчиликлерине тюшюнюрюкдюле, деп къошханды ол.

Быллай эришиулени юслери бла къутхарыучуну усталыгъыны юсюнден жаш тёлюлеге билдириуню эм спортну айнытыуну борчлары тамамланыладыла. Алагъа бир кере къатышхан сабийле  экинчи жылда да келирге сюедиле. Артда уа къутхарыучуну усталыгъын сайлагъанла да бардыла. Юлгюге, Фарида Гедуеваны бу эришиуге эки жыл мындан алгъа чакъыргъандыла, андан сора уа ол кеси да сынаулагъа къатышыргъа сюйгенди. Къызны мураты энди МЧС-ни академиясына окъургъа кириргеди.

Эришиулеге от ёчюлтюу-къутхарыу бёлюмлени барысындан да жыйырма беш къауум къатышадыла. Окъуучула хазырланыуну от ёчюлтюучюле бла бирге ётгендиле, жарау этиу къаланы терезелери бла кирирге да юйреннгендиле. Эришиуле битеу да юч кюнню бардырылгъандыла, кеслери да талай кесекден къуралгъандыла. Алчы жерлеге аланы барысын да жетишимли ётгенле чыгъарыкъдыла.

Кульчаланы Зульфия.