Озгъан ыйыкъда Нальчикде «PROАгро СКФО 4.0» деген уллу эл мюлк форум-кёрмюч ётген эди. Аны чеклеринде дагъыда бизни республикада талай алчы мюлкге шагъырейлениу халда экскурсия бардырылгъанды. Аны да ол форумну къурагъан «Халкъ фермер» биригиуню регионда бёлюмюню башчысы, агроблогер Мурат Теунов ётдюргенди.

Алай бла къонакъла биринчиден «Юг-Агро» предприятияда болгъандыла. Ала анда хайырланылгъан технологияла эмда амалла бла шагъырейленнгендиле, кёкшууну эмда нартюхню къалай ёсдюргенлерине къарагъандыла, нашала бла шампиньон жууала битген теплицалагъа да кёз жетдиргендиле, аланы ишчилери бла ушакъ этгендиле.

«Бай тирлик» компаниягъа келгенлеринде уа алагъа алмаланы кеси жыйгъан техниканы кёргюзтгендиле. Ол мюлкню келечилери айтханларына кёре, быллай затланы хайырындан тирлик жыйыу тёрт кереге терк барады, аны себепли ишге да азыракъ адам къатышады. Техника алмаланы аяулу, жара салмай жыяды. Комбайнны юсюнде ыз бла ала орунлагъа тюшедиле, анда да тизгин-тизгин жыйыладыла.

Къонакъладан бири, бизни къыралгъа сугъаргъан оборудование келтириу бла кюрешген «Scarabelli Group» компанияны экспорт жаны бла келечиси Стефано Вертуани кёрген затларыны юсюнден кесини оюмун билдиргенди, бизде агрономлагъа да къыйматлы информация бергенди.

Айтханыбызча, «PROАгро СКФО 4.0» формагъа РФ-ни Эл мюлк министерствосу, Россельхознадзор, Нальчикни администрациясы эмда Россельхозбанк себеплик этгендиле.

Улбашланы Мурат.