Саулай да къыралда адамла эм кёп къатышхан «Миллетлени кроссу» деген эришиу ётдюрюлгенди, аны бардырыугъа Нальчикни жер-жерли администрациясы болгъанды. Ол тёрели халда эки минг алтынчы жылдан бери къуралады, анга къыралны регионлары барысы да къатышадыла. Нальчикде эришиу ара солуу паркда бардырылгъанды. Чабыугъа мингден аслам адам къатышхандыла, аланы араларында гитчеле, абаданла да болгъандыла, алагъа жыл сан жаны бла чекле салынмагъандыла. Аладан саулукъларыны юсюнден врачдан справка, паспорт неда башха документ изленнгенди. Спортчула паркда «Чай юйчюкню» къатында жыйылгъандыла.

Чапханлагъа кёл этдирирге спортну ветеранлары Къабарты-Малкъарны физкультурасыны эм спортуну сыйлы къуллукъчулары Уяналаны Владимир, Басир Наурузов бла Руслан Гоноков, РСФСР-ны  халкъны жарыкъландырыууну отличниги Анатолий Тхакахов, Россейни сыйлы тренери Олег Саральпов келгендиле. Баш судья уа женгил атлетикадан Россейни сыйлы тренери Сергей Садыков болгъанды.

Шахарны администрациясыны физкультура эм спорт управлениясыны башчысы Ладин Апшев белгилегенича, бу башламчылыкъ адамланы миллетлерине, жыл санларына, спорт жаны бла хазырлыкъларына къарамай бирикдиреди. Белгилисича, быллай эришиуледе хорлам угъай, къатышыу магъаналыды. Чапханлагъа къараргъа аслам адам да келгенди. Спортчулагъа кёл этдирирге уа ата-аналары, тренерлери да жыйылгъандыла.

Алгъышлау сёзледен сора эришиуню жыйырма бир жыллары толгъан эм андан абадан къызла ачхандыла, ала эм узун жолну чапхандыла. Кёбюсюне ол къыйын да тюйюлдю, ала «Спартакда», паркда да жараулагъа жюрюйдюле. Кроссда хорлагъан Вероника Танифа, эришиуге «Спартакны» атындан къатышханын билдире, бу жетишимге жюрегинден къууаннганын, ол къадалып жарау этиуню эсеби болгъанын чертгенди. Беш жюз метрде эм терк Къалабекланы Азиза болгъанды. Спорт бла ол профессионал халда кюрешеди, алай бу эришиуге уа энчи хазырланмагъанды. «Мында командабызны жартысы чапханды, тенглерими хар бирине да хорлам тежейме. Кесим а бу эришиуге биринчи кере къатышмайма, дегенди спортчу», - дегенди ол. Биринчи жерлеге узунлукъларына кёре башха-башха жоллада Тимур Хакулов, Атабийланы Малика, Дамир Арсаев, Милана Тхалиджокова, Ахметланы Хасан, Артём Воронин эм башхала чыкъгъандыла.

Хорлагъанлагъа Спорт министерстводан, шахарны администрациясыны Физкультура эм спорт управлениясындан грамотала, кубокла эм майдалла, «Чемпион» тюкенден саугъала берилгендиле.

Кульчаланы Зульфия.