Озгъан солуу кюнледе Элбрус районну Билим бериу управлениясыны жаш тёлю политика жаны бла бёлюмю «Халаллыкъ - бийикликде» деген ат бла экология фестиваль бардыргъандыла. Ол районну башха организацияларына ариу ыз къоярыгъына ийнанабыз.

 Бу огъурлу жумушну къуралыууна дагъыда «Барс-Тырныаууз» деген Аскер искусстволаны академиясыны таматасы Этезланы Владимир, Отарланы Омар атлы район краевед музейни таматасы Этезланы Фатимат бла «ГрафиУМ» деген реклама агентствону таматасы Максим Максимов да къатышхандыла.

Фестиваль «Жаш тёлюге болушлукъ этиу системаны айнытыу», «Россейни жаш тёлюсю» деген Федерал программаны чегинде къуралгъанды. Аны мураты, ёсе келген тёлюню инсан-патриот сезимлерин,  волонтёрланы  къымылдауларын, экология эм туризм, краеведение жаны бла сейирлерин айнытыу болгъанды. Жаш волонтёрла, окъуучула эм шахарны жамауаты фестивальгъа къатышхан заманларын зауукълу ётдюргенлерин айтхандыла. Ала Тырныауузну тёшлеринде, Къамгъут- Кешенеге дери ёрлеп, аны тёгерегин тизгин этгендиле. Жыйылгъанлагъа Фатимат Асхатовна бу кешенени тарыхын хапарлагъанды. Сабийле кеслери барып кёралгъанлары ючюнмю болур  огъесе  хапарлаучу сейир этдиралгъаны ючюнмю болур, бек сюйюп тынгылагъандыла. Аны бла байламлы соруула да кёп болгъандыла. Дагъыда «Эл-Журт» деген жерни жашаууну, турмушуну юсюнден да айтханды музейни таматасы.

Фестивальны чеклеринде палаткаланы къалай орнатыргъа кереклисини, табийгъатда походха чыкъгъаннга отну къалай тюз тиргизе билирге керек болгъанына юйретген мастер-класс да кёргюзтюлгенди. Ызы бла исси чайла да иче, шуёхлукъ халда отну тёгерегинде жаш тёлюню къууандыргъан, жарсытхан сорууланы сюзгендиле, поход оюнла ойнагъандыла.

 Жаш тёлюню ишлери жаны бла бёлюмюню таматасы Атмырзаланы Алиса  районда быллай магъаналы жумушланы дайым да бардырады. Анга сабийлени аталары бла аналары да огъурлу кёзден къарайдыла. Бу жумушлагъа къатыша, тарыхны билгенден сора да, табийгъатны аламат къудуретин тазалыкъда сакълай билирге юйреннгенлери неден да багъалыды.  Спортну бла рекламаны келечилерини сейирлери болуп, бир жанлы болмай, юйретиу ишге уллу къошумчулукъ эталгъанлары махтаулуду.

Темуккуланы Асият.