РФ-ни Сауутланнган кючлери Донбассда бардырылгъан энчи аскер операция бла байламлы Запад къыралланы бир къаууму Украинагъа     Америкада эм Европада чыгъарылгъан ракетала бла Россейни ичине урургъа эркинлик берликдиле дегенча хапарла кёплени къайгъы этдиределе, ала шёндю асламлы информация органланы баш темаларындан биридиле. Президентибиз Владимир Путин аны бла байламлы былай айтханды: «Украинлылагъа узакъгъа жетдирген ракетала бла атаргъа эркинлик берилсе, НАТО-ну бла Россейни арасында уллу къауагъа чыгъаргъа боллукъду. Нек дегенде аллай сауутланы жаланда запад специалисте биледиле, хазырлайдыла, урур жерни марайдыла, атдыргъан да ала этерикдиле. Башхача айтханда, бизге ала «чабыууллукъ этгенчады». 

Белгилисича, Украина бюгюннге дери да Россейни жерлерине запад сауутла бла атып тургъанды, ол санда Кърым кёпюрню чачдырыргъа да кюрешгенди. Аны юсюнден ол къыралны Баш тасхачы управлениясыны оноучусу Кирилл Буданов букъдурмай айтхан эди.

Украинлы аскерчиле 6 августда Курск областьха киргенде уа, ингилиз эм немис танкланы хайырланнгандыла. Дагъыда Белгородха бир ненча кере Чехияда чыгъарылгъан ракетала бла уруп тургъандыла. Шёндю уа АБШ бла Великобритания Украинагъа ракетала бла Россейни ичине урурча эркинлик берирге жашыртын халда оноулашхандыла, деп билдиреди LBC радиостанция.  Анда айтылгъанына кёре, биринчи ракетала бла ургъандан сора, ала халгъа къарарыкъдыла да, сора андан ары не этерге боллугъун белгилерикдиле. Ахыр оноуну уа Нью-Йоркда ООН-ну Генеральный Ассамблеясында чыгъарыргъа керекдиле. 

Дагъыда Европалы парламент ракетала бла Россейни ичине атаргъа излеп, алгъын заманлада ол жаны бла салыннган чеклени кетерирге деп оноу этгенди. Аны бла байламлы РФ-ни Къырал Думасыны депутатлары, иш алайгъа къалса, «биз алагъа андан эсе кючлю сауутну атаргъа боллукъбуз» деп билдиргендиле.  Къырал Думаны спикери Вячеслав Володин: «Европарламентни депутатлары, Евросоюзну къыраллары Киевге Россейни узакъгъа учхан ракетала бла уругъуз деп, аны бла битеу дунияны атом урушха тюртедиле»,-дегенди.

Кесигиз кёргенликден, Запад политикле бирден Россейге къажау сюелиуню селейтмейдиле. Суу тюбюнден, жерден, кёкден да бирден атарча атом саууту болгъан къырал бла ачыкъ къаршчы сюелиу не бла бошаллыгъын ангыламайдыла неда ангыларгъа сюймейдиле. Былайда бир затны эсгертирге сюеме. Кёп болмай Германияны таматасы Олаф Шольц  Къазахстаннга баргъанда, ол къыралны таматасы Токаев канцлер анга Украина бла байламлы берген соруугъа: «Россейни аскер жаны бла хорларгъа амал жокъду»,- деп къысха жууаплагъанды. Тюбешиу бошалгъандан сора, Шольц тёрели пресс-конференциягъа кеси чыкъгъанды.

Арт заманда энчи аскер операцияны жетишимли бардырыу бла байламлы Россейни Президенти Владимир Путин Киевде НАТО-ну ракета сауутлары бла хайырланыргъа къызынып тургъанларын чертгенди. Болсада наточула Украинада бола тургъан къаугъагъа ачыкъ къатышыргъа алыкъа базынмайдыла. Аланы аскерлери ары кирселе, энчи аскер операцияны бардырыу амалы да тюрленирикди, Россей мычымай къокъуусузлугъун  жалчытыр амалланы этип башларыкъды, дегенди.

Президентибизни пресс-секретары Дмитрий Песков билдиргеннге кёре,  башда сагъынылгъан къайгъыла бла байламлы  Москва болумну контрольда тутады эмда «аскерчиле да  Западха жуууапларын берирча, тийишли мадарла этедиле». Дагъыда ол Владимир Путин бу кюнледе Запад къыраллагъа этген заявлениясында алагъа шарт белги бергенин, ала аны эштгенлерин да чертгенди.

РФ-ни Тыш къыралла бла ишлерини министри Сергей Лавров запад къыралла украинлы неонацистлеге берген сауутлары бла къаугъаны бютюн узакъгъа созадыла эмда «ала от бла ойнайдыла» деп жазгъанды ведомствону сайтында. Дагъыда бизни аскерчилерибизни тышындан ары жиберилген аскер жюклени жокъ этерге эркинликлери болгъанын чертгенди. Эсигизге салайыкъ, бу кюнледе мамыр жюк келтирирге деп ишленнген кемеде аскерчилерибиз ракеталаны эслеп, аланы кеме бла бирге атдыргъандыла. Министрни айтханына кёре, НАТО Украинаны сауут бла жалчытхандан сора да, аскер кадрланы хазырларгъа уллу къошумчулукъ этеди.

Былайда бир затны белгилерге боллукъду, биз барыбыз да бек ышанабыз ол Москва чертген «къызыл ызланы» ётерге жарамагъанын европалы политиклени ангыларыкъларына. Россейни халкъы тёзюмлюдю, алай хар затны да бир мардасы барды. Лавровну айтханына кёре, Россейни Сауутланнган кючлери шёндю болмагъанча хазырдыла битеу алларында тургъан борчланы толтурургъа.  Киевни «иелерине» тийишли жууап берилликди, керек болса, деп чертгенди Sky News Arabia агентствогъа интервью бере ол.

Украинагъа узакъгъа учхан ракетала бла Россейге атаргъа эркинлик берилсе, АБШ алгъа Зеленский кесин къалай жюрютюрюгюне къараргъа сюеди. Къыш айла да жетип келедиле, ол ракетала анга ол кезиуде болушлукъ берликмидиле къаугъаны анадан ары бардырыргъа – ол да аланы сагъышландыргъандан сорууладан бириди. Андан сора да, Джо Байденни администрациясыны Украинаны тохтаусуз аскер сауут бла жалчытыуу Америкада бардырыллыкъ президент айырыулада Камала Харрисге чырмау этерге да боллукъду деген къоркъуу барды.

Къысхасын айтханда, Россейни Сауутланнган кючлерини арт кезиуледе СВО-да болдургъан жетишимлери НАТО-ну келечилерин адыргыгъа къалдырып турады. Сюйселе-сюймемеселе да, Баш командующий айтханлай, энчи аскер операцияны борчлары чегине жетдирилмей къаллыкъ тюйюлдюле.

Къонакъланы Хасан, баш редактор.