КъБР-м и Парламентым и УнафэщI Егоровэ Татьянэ республикэм и хабзэубзыху орган нэхъыщхьэм и ебланэ зэхуэсыгъуэм и президиумым и япэ зэIущIэр иригъэкIуэкIащ.
Абы щагъэбелджылащ КъБР-м и Парламентым и зи чэзу зэIущIэр жэпуэгъуэм и 3-м сыхьэт 11-м зэхэтыну. Абы депутатхэм щыхахынущ КъБР-м и Iэтащхьэр.
Президиумым унафэ къищтащ КъБР-м и Парламентым и Аппаратым и унафэщI ФочыщIэ Наталье и къулыкъум пищэнымкIэ КъБР-м и Парламентым и УнафэщIым арэзыныгъэ зэрыратым ехьэлIауэ.
- Республикэм и Парламентыр къызэрыунэху лъандэрэ абы и Аппаратым щолажьэ ФочыщIэ Наталье, абы къыхэкIыуи ирагъэкIуэкI Iуэхум зыхуэмынэIуасэ хэткъым. Апхуэдэуи къыхэзгъэщынут Аппаратым и унафэщI IэнатIэм ар зэхуэсыгъуитI хъуауэ зэрыпэрытри. КъБР-м и Парламентым и Аппаратым и лэжьакIуэхэми депутатхэми абы пщIэ къыхуащI, и Iуэху бгъэдыхьэкIэр ягу дохьэ, - жиIащ Егоровэм.
Депутатхэр ФочыщIэ Наталье ехъуэхъуащ дяпэкIи ехъулIэныгъэфIхэр и лэжьыгъэм щиIэну.
АдэкIэ зэIущIэм щыхэплъащ «КъБР-м и цIыху щхьэхуэхэм къэралым зэрызащIигъакъуэм теухуауэ» КъБР-м и Законым и Iыхьэ 5-мрэ 10-мрэ зэхъуэкIыныгъэхэр хэлъхьэным и IуэхукIэ» КъБР-м и законым и проектым. Ар ягъэхьэзыращ Урысей Федерацэм и Президентым «Бынунагъуэшхуэхэм зэрызыщIагъакъуэ Iэмалхэм теухуауэ» 2024 гъэм щIышылэм и 23-м къыдигъэкIа Унафэ №63-м къыщыгъэлъэгъуахэр къэлъытауэ.
- Дэфтэрыр КъБР-м и Правительствэм игъэхьэзыращ дэIэпыкъуныгъэм хуэныкъуэ бынунагъуэшхуэхэр дгъэбелджылын, коммунальнэ Iуэхутхьэбзэхэмрэ псэупIэм щIат уасэмрэ я процент 30-м нэблагъэкIэ мазэ къэс зэрызыщIагъэкъуэнур дубзыхун папщIэ. Дэфтэрым къыщыгъэлъэгъуахэр гъэзэщIэным республикэ бюджетым щыщ зэрытекIуэдэнум къыхэкIыу, КъБР-м и Iэтащхьэм деж ар едгъэхьащ. Мы Iуэхум социальнэ мыхьэнэшхуэ зэриIэр къилъытэри, абы законопроектыр къыддиIыгъащ, - жиIащ КъБР-м и Парламентым ЛэжьыгъэмкIэ, социальнэ политикэмкIэ, узыншагъэр хъумэнымрэ ветеранхэм я IуэхухэмкIэ и комитетым и унафэщI Къэжэр Хъусен.
Законопроектым IуэхущIапIэ зэмылIэужьыгъуэхэр хэплъэну иратащ, абы щIэ къыхалъхьэмэ, республикэм и хабзэубзыху IуэхущIапIэм и зэIущIэм щыхэплъэнущ.
Депутатхэр тепсэлъыхьащ КъБР-м и Парламентым 2024 гъэм и бжьыхьэ лэжьэгъуэм иригъэкIуэкIыну Iуэхугъуэ нэхъыщхьэхэм. Къэпщытэныгъэмрэ регламентымкIэ комитетым пщэрылъ щащIащ дэфтэрым хэлэжьыхьыжу, Парламентым и зэIущIэм къыщыхилъхьэну.
ЗэIущIэм щызэпкърахащ УФ-м и щIалэгъуалэ политикэм, 2025 гъэм цIыхухэм я пенсэм щыхудыщIагъуну пIалъэм, нэгъуэщIхэми ятеухуа федеральнэ законхэм я проектхэр.
Депутатхэр хэплъащ «Балигъ ныбжьым нэмысахэм хабзэр къызэпемыгъэудынымкIэ ирагъэкIуэкI лэжьыгъэм теухуауэ» Федеральнэ законым и Iыхьэ 5-мрэ УФ-м и ЩIы кодексым и Iыхьэ 27-мрэ зэхъуэкIыныгъэхэр хэлъхьэным теухуа жэрдэмхэм.
Депутатхэм даIыгъащ Ищхъэрэ-КъухьэпIэ федеральнэ округым (Ленинград щIыналъэм) мэзхэр къагъэсэбэпу пхъэ зыгъэхьэзыр я бэджэндырылажьэхэм къэралыр зэрадэIэпыкъу Iэмалхэм, ветеринар Iуэхутхьэбзэхэм ахъшэ щIрагъэту хабзэхэр къызэпаудмэ, жэуап зэрырагъэхьынум, хьэкIэкхъуэкIэхэм я зэранкIэ гъуэгум къыщыхъу транспорт зэжьэхэуэхэр гъэмэщIэнымрэ шынагъуэншагъэр егъэфIэкIуэнымрэ теухуауэ нэгъуэщI щIыналъэхэм кърагъэхьа жэрдэмхэр.
КъБР-м и Парламентым ЦIыхубэ шынагъуэншагъэмрэ Iулъхьэм пэщIэтынымкIэ и комитетым и унафэщI Кривко Михаил жиIащ «комитетым хухах сыхьэтым» хыхьэу, «КъБР-м и адвокат лэжьыгъэм теухуауэ» Iуэхум зэрытепсэлъыхьар.
КъБР-м и Парламентым ЕгъэджэныгъэмкIэ, щIэныгъэмкIэ, физическэ щэнхабзэмкIэ, спортымрэ щIалэгъуалэм я IуэхухэмкIэ и комитетым и унафэщI Емуз Нинэ и гугъу ищIащ «Республикэм и щэнхабзэмрэ гъуазджэмрэ зегъэужьыным и лъэныкъуэкIэ еджапIэ нэхъыщхьэхэм ягъэзащIэ къалэным ехьэлIауэ» КъБР-м и Парламентым и президиумым и унафэхэр зэрыпхыкIым (Кавказ Ищхъэрэм ГъуазджэхэмкIэ и институтым и щапхъэкIэ).
КъищынэмыщIауэ, депутатхэр арэзы техъуащ цIыху щхьэхуэхэм КъБР-м и Парламентым и ЩIыхь тхылъыр иратыну къызэрагъэлъэгъуам.
КъБР-м и Парламентым и пресс-IуэхущIапIэ.
