Къэбэрдей-Балъкъэрым и щIыналъэ­хэм ящыщу Тэрч районым и мэкъумэ­шыщIэхэр бжьыхьэсэм япэу пэрыхьащ. ИджыпстукIэ ар щыхащIащ гектар мини 3-м. Бжьыхьэсэ къэкIыгъэхэм я жылапхъэу къагъэсэбэпыр фIагъ лъагэ зи­Iэхэрщ, щIыгъэпшэрхэри Iэмал имыIэу халъхьэ. 

Республикэм и щIыналъэхэм псоми бжьы­хьэсэм щыщIадзэнур жэпуэгъуэм и япэ махуипщIырщ. Мы гъэм абы хухахыну я мурадщ гектар мин 65-рэ, ику иту илъэс къэс къагъэсэбэпри аращ. Бжьыхьэсэм и процент 70-р гуэдзым, процент 20-р хьэм иратынущ, адрей къанэр рапсым, Iэщым ирагъэшхыну къэкIыгъэ щхъуантIэм, нэ­гъуэщIхэм хухахынущ.
«Россельхозцентр»-м Къэбэрдей-Балъкъэрым щиIэ къудамэм къызэритамкIэ, бжьыхьэсэр тэмэму ирагъэкIуэкIын папщIэ жылапхъэу тонн мин 15 хуэдиз республикэр хуеинущ. Абы щыщу тонн мин ­1­3-м нэблагъэр гуэдз жылапхъэу щытынущ. 
ХЬЭЩЫКЪУЕЙ Олег.