Москва къалэм и «Крокус Экспо»-м иджыблагъэ щекIуэкIащ ерыскъыхэкI­хэм ехьэлIа, «WorldFood Moscow» фIэ­щыгъэр зезыхьа 33-нэ дунейпсо гъэлъэгъуэныгъэр. Абы хэтащ Урысей Федерацэм и щIыналъэхэм ящыщу 68-м, хамэ къэралхэм я IуэхущIапIэ  зэхуэмыдэу, ерыскъыхэкIхэр зезыгъакIуэу 1100-м щIигъу.

КъБР-м экспортыр дэIыгъынымкIэ и центрым абы щигъэлъэгъуащ «Налшык-IэфIыкIэ», «Сириус-М» IуэхущIапIэхэм, хьэ­рычэтыщIэхэу Жэбалы Рустамрэ Хожаев Iэубэчыррэ я продукцэхэр.
«Крокус Экспо»-м ди щIыналъэм щыхухаха щIыпIэм деж республикэм и продукцэхэм къыщIэупщIа компаниехэм я лIы­кIуэхэм зэпсэлъэныгъэхэр драгъэкIуэкIащ лъэныкъуэхэр зэдэлэжьэным теухуауэ.  
Гъэлъэгъуэныгъэр екIуэкIащ УФ-м и Президент Путин Владимир и жэрдэмкIэ къыхалъхьа «Хьэрычэт IэнатIэ мыинымрэ курытымрэ» лъэпкъ пэхуэщIэм ипкъ иткIэ. Къэбэрдей-Балъкъэрым и лIыкIуэхэр абы хэтащ  КъБР-м Экономикэ зыужьыныгъэмкIэ и министерствэм и дэIэпыкъуныгъэ хэлъу.