Пащтыкъ Салисэт и ныбжьыр илъэси 8 мэхъу. Налшык къалэм дэсщ, курыт еджапIэ №31-м и 3-нэ классым щIэсщ. Хъыджэбз Iущ цIы­кIур тху защIэкIэ йоджэ, нэхъыфI дыдэу елъагъу математикэмрэ сурэт щIынымкIэ дерсхэмрэ. Салисэт адыгэ ­къафэм щы­хуагъасэ, щых­ра­гъэдыкI, су­рэт щащI гуп­жьейхэм йо­кIуалIэ, псы есы­кIи зрегъасэ. ШколщIыб дерс хэхауэ адыгэ­бзэмрэ инджылызыбзэмрэ едж.
Сытым зрипщытми хъыджэбз цIы­кIум псо­ри тыншу къохъулIэ, ауэ псом хуэ­мы­дэжу и псэм хэлъыр сурэт щIынырщ. И ныбжьым емылъытауэ, сурэт щIынымкIэ зэфIэкI зэриIэм Салисэт и анэм гу лъитащ пасэу - иджыри сабий садым щы­кIуэм. Интернетым и Iэмалыр къигъэ­Iэ­рыхуати, сурэт щIынымкIэ абы илъ видеодерсхэр къигъуэтурэ еплъырт, илъагъухэр ищIы­жырт. Илъэс хъуауэ абы гъуазджэмкIэ егъэджакIуэ къыдолажьэ щхьэхуэу, ­Iэмал щигъуэткIэ, сурэт щIынымкIэ мастер-класс зэхуэмыдэхэм ма­кIуэ. И благъэ-Iыхь­лыхэм къыщалъхуа махуэр ягъэлъапIэмэ, Салисэт фIэфIщ езым ищIа сурэт дахэ яритыну. 
Иджыблагъэ Пащтыкъыр ирагъэблэ­гъащ къалэм къыщызэIуахагъащIэ «Горь­кий» шхапIэм и теплъэр ищIыну. Ар сабий зэ­чиифIэм къызэригъэлъэгъуар ягу ирихьащ. СурэтыщIым къыIэрыхьащ пщIэ­кIэ зэлэжьыну лэжьыгъи - сурэт ­ирагъэщIыну зыкъы­хуагъэзащ. Хъы­джэбз цIыкIур а псом щогуфIыкI, ехъу­лIэныгъэ зыIэригъэ­хьэху мэгуш­хуэ, нэхъри хуопабгъэ щIэщыгъуэу зыгуэрхэм зрипщытыным.