Огъары Басханнга кирген жерде атланы, чатырланы да кёрюп алайда тохтадыкъ. Алчакъланы Рамазан айтханнга кёре,  (ол бу ат чаришни къурагъанладанды), алгъа Къарачай-Черкес республикада къумалы къарачай атланы тутханла, бизни республикада жылкъылары болгъанла бла бирге  «Кавказны  миллетлерини шуёхлугъуну  кубогу» атла бла эришиуле бардырыр муратлы эдиле. Алай бу хапар жайылгъан бла  Дагъыстан, Чечен, Ингуш, Татарстан республикаладан, Ставрополь крайдан да кёп атлы келгендиле. Огъары Басхан элден Сторожевая  станицагъа таула бла ала да  230 километр жолну къыдырыкъдыла.

Эришиуле 29  сентябрьде бошаллыкъдыла. Биринчи жерни алгъаннга - 1 миллион сом.  экинчи жетгеннге-600 минг сом,  ючюнчю жерге чыгъалгъанга уа 400 минг сом ахча берилликди. Эки респуюдиканы чегин Балыкъ сууну башында ётерикдиле. Эришиулени къурагъанла айтханнга кёре, бу жумуш миллетлени бирлешдирирге себеплик этерик ишди.

Мамайланы Алий.