Россейни МЧС-ини регионда бёлюмюнде белгилегенлерича, от бла ойнау къыйын болумгъа келтирмей хазна къоймайды. Ол санда уа тютюн ичиу да, эм кёп адам аны хатасы бла чыкъгъан къыйын болумлада ёледиле.

Аны бла байламлы ведомство бир заманда да ундурукъда жатып тургъанлай тютюн ичмезге чакъырады. Инсан жукълап къалса, ол къолундан тюшюп, тёгерекде болгъанны терк къабындырлыкъды, от отоуну къысха заманны ичинде аллыкъды. Тютюн ичгенде жылыуну тышына жибермеген, къабынмагъан материалладан ишленнген кюл атхан орунланы хайырланыргъа, жандырылгъан тютюнню къараусуз къоймазгъа керекди. Кюл жыйылгъан орунну кир-кипчик атхан челекге къуяргъа жарамайды, ол, жилтин болса, мычымай къабынырыкъды.

Балконлада тютюн ичерге, ёчюлтюлмеген тютюнлени энишге атаргъа да эркин этилмейди. Жел уруп, аланы тюбюнде къоншуланы балконларына кийирирге боллукъду. Алада терк къабыннган затла болсала уа, тёгерек жанарына къоркъуу уллуду. Бир отоудан бирсине, бир балкондан башхасына кёче, ол битеу юйню аллыкъды. Ёчюлтюлмеген тютюнню бир заманда да хансха атаргъа жарамайды, от аны терк аллыкъды. Ишлеген жерледе тютюнню жангызда аны ючюн деп белгиленнген жерледе ичерге боллукъду.

Къоркъуусузлукъ, бек алгъа, инсанны кесини къолундады.

Кульчаланы Зульфия.