Бу ыйыкъда Къабарты Малкъар гуманитар-техника  колледжни студентлери заманларын, окъуу, билим алыу ызларын да магъаналы ётдюргендиле.  Сабийле, белгилисича,  кабинетден чыкъмай бардырылгъан дерследен эсе, жангыртылгъан амалла бла къуралгъанланы  бегирек  сюедиле.

Баш кюн, «Эм магъаналы затланы юслеринден ушакъла» деген проектни жашауда бардырыуну чеклеринде  куратор сагъатла ётгендиле. Аланы темалары тюрлю-тюрлю эдиле. Аладан бири уа  «Россейни жоллары бла»деген ат бла бардырылгъанды. Анда  «Россейни темир жоллары»  деген теманы бютюн  терен тинтгендиле. Бу ачыкъ акционер биригиу  адамланы ташыгъан ышаннгылы  уло у болгъанын белгилегендиле. Дагъыда окъуучула Россейни улоу сферасыны айныууну юсюнден кеси оюмларын айтхандыла, аны бла байламлы иш усталыкъланы сюзгендиле, лекциягъа да тынгылагъандыла.

Темир жолла Россейни  айныгъанлай тургъан бёлюмлеринден  бириди.Ол алай болур ючюн а, кёп тюрлю усталыкъланы  келечилери къыстау урунадыла. Поездни, темир жолда жюрюген къайсы улоуну да, хар кереги излемлеге келишип, тохтамай ишлер ючюн, специалистлени хазырлыкълары бийик даражада болгъанын да сюзгендиле. Жаш адамла  Тюбешиуню ахырында, сабийле  «Россейни темир жоллары»  биригиу бизни къыралда, саулай да дунияда жумушун аламат жалчытхан компания болгъанын чертгендиле.

 Кёп тюрлю иш усталыкълагъа юйретген окъуу юйде, сабийле бла  бирге быллай магъаналы сорууланы кётюрюп, алагъа,  окъуучуланы оюмларына таяна,  жууап излегенлери, окъутуу ызны  игилендирген жангычы амалладан бириди.

Темуккуланы Асият.