Къабарты-Малкъар къырал аграр университетни агрономия бёлюмюню окъуучулары «Сабанны кюню - 2024»  проектге  къатышхандыла. Аны Россейни илмула академиясыны КъМР-де илму арасыны эл мюлк институту кёп болмай бардыргъанды.

Илму учрежденияны алимлери къонакълагъа нартюхню алтмышдан артыкъ сорту эмда гибриди ёсген сабанланы кёргюзтгендиле. Аланы уа жаланда  бу институтда угъай, нартюхню Битеуроссей илму излем институтунда, «Лидея» организацияда, Лукьяненко атлы миллет арада эмда «Отбор» агрофирмада жарашдыргъандыла.

Студентлеге  бу институт не бла кюрешгенини юсюнден айтхандыла. Аны нартюхню селекциясы эмда урлукъчулукъ бёлюмюню таматасы Беслан Шомахов гибридлени энчиликлерини юсюнден хапарлагъанды, ала къаллай тирлик берликлерин, ауруулагъа  чыдамлылыкъларын  да туура этгенди. Эл мюлк илмуланы кандидаты, институтну лабораториясыны башчысы Хасан Тарчоков а шёндюгю агротехнологияла бла шагъырейлендиргенди.

Окъуучула кёргенлерин жаратхандыла, айтылгъаннга иги эс буруп тынгылагъандыла, кеслерине хайырлы кёп зат эшитгендиле, деп чертгендиле КъМКъАУ-ну пресс-службасында.

Улбашланы Мурат хазырлагъанды.