Орус география обществону «НЕурок географии. Вместе с природой» деген жарыкъландырыу проектини чегинде Къабарты-Малкъарны Черек районунда бийик тау болумлада – Хумалан ауузда «НЕурок географии» бардырылгъанды.

Обществону регионда бёлюмюню башчысы Аксана Карашева айтханыча, жаш адамла республикабызны тауларыны юсюнден кёп жангы зат билгендиле, аланы сейирлик табийгъатларын кеси кёзлери бла кёргендиле. Хумаланнга жол а эрттенликде эртте башланнганды, жолоучула танг жарыгъына Бызынгыны тауларында устаз географ-краевед Геляланы Чомайны сейир хапарына тынгылай тюбегендиле. Жолоучуланы араларында уа республиканы жарыкъландырыу эм илму министри Анзор Езаов, жаш тёлюню ишлери жаны бла министр Азамат Люев, курортла эм туризм министрни орунбасары Асланби Шхагапсоев, устазла, Орус география обществону регион бёлюмюню, «Альтаир» жаш тёлю клубуну келечилери да болгъандыла.

«НЕурок географии» проектге республикабыз биринчи кере къатышады, ол бардырылгъан заманны ичинде табийгъатны юсюнден билимлерин 600-ден аслам адам игилендиргендиле. Аксана Карашева дерсни къураугъа къошумчулукъ этген мектеплеге да ыразылыгъын билдиргенди. Ол белгилегенича, сабийле бу дерслерин, кабинетледе тышында, харкюннгю дерследеча болмай, табийгъатда ётдюредиле. Ол алагъа сейир да кёрюнеди. «Ишчи нёгерлерибиз бла бирге дерсни бардырыугъа Россейни эм ариу жерлеринден бирин – Хумаланны - сайлагъанбыз, ол эки минг метр бийикликде орналады. Муратыбыз бу ишге окъуучула бла жаш тёлюден сора да, абадан адамланы да къатышдырыргъа эди. Аны толтуралгъанбыз! Акциябызгъа саулай юйюрле окъуна келгендиле. Хумаланнга жолубузда Кавказны бешминглик сегиз тауундан алтысын – Дых тауну, Шхараны, Коштан тауну, Джанги тауну, Пушкинни къаясын, Мижиргини – кёргенбиз. Лекциябызны ол къадар ариулукъда бардыргъаныбызгъа къууанабыз. Мында устаз дерсде сагъынылгъан тауланы барысында да туура кёргюзталгъанды. «НЕурок географии» Къабарты-Малкъарны къыраллыгъыны кюнюне аталгъанын да белгилерге сюеме. Жашауун Черек районну ариу табийгъатын тинтиуге бла сакълаугъа жоралагъан алимни лекциясына тынгылагъан а жыйылгъанлагъа сейир болгъанына ишеклигим жокъду», - дегенди Аксана Карашева.

Анзор Езаов табийгъатда нёгерлери бла бирге дерсни быллай сейир халда ётдюрюуню унутмазлыкъларын билдиргенди. Азамат Люев да башламчылыкъгъа сюйюп къатышханын, ол внедорожникледе краеведение туризмни бла географияны бирикдиргенин, аламат ушакъ майдан болгъанын айтханды.

Дерс Элекансу чучхургъа жолоучулукъ бла бошалгъанды.

Кульчаланы Зульфия.