КъБР-м и Iэтащхьэ КIуэкIуэ Казбек Къэбэрдей-Балъкъэрым Наркотикхэм пэ­щIэтынымкIэ и комиссэм и зэIущIэ иригъэкIуэкIащ. 

УФ-м и Президентым къэралыр шына­гъуэншэу щытыным хуэгъэпса и указым зэрыщыжиIэмкIэ, наркотикхэмрэ цIыхур  зыгъэундэращхъуэ пкъахуэхэмрэ щэныр къэралым и шынагъуэншагъэр къэзыгъэ­тIасхъэ дунейпсо щIэпхъаджагъэхэм хеу­быдэ. 
ЗэIущIэм къекIуэлIахэр едэIуащ хабзэ­хъумэ IуэхущIапIэхэм я унафэщIхэм утыку кърахьа, наркотикхэм пэщIэтыным хуэгъэзауэ иужьрей мазихым къриубыдэу ирагъэ­кIуэкIа лэжьыгъэм ятеухуа къэпщытэныгъэм. Апхуэдэхэм хеубыдэ щIэпхъаджащIэхэм я хьэпшыпхэр ирагъэкIын, наркотикхэм щIалэгъуалэр драгъэхьэхын папщIэ, иджырей интернет Iэмэпсымэхэр щIэгъэ­хуэбжьауэ къызэрагъэщхьэпэри. Адрей псом нэхърэ нэхъ уегъэгузавэ наркотикхэр уи цIэр къыумыгъэлъагъуэу интернетым зэрыщыбгъуэтым. Дызэрыт зэманым нэхъ зрахьэлIэр щхъухьым и «синтетикэ» лIэу­жьыгъуэхэу псынщIэу узэсэхэм хуэдэщ, иужькIэ абыхэм къаIэщIэмыкIыжыфу, абы хуэерыщхэм я унагъуэхэмрэ Iыхьлыхэмрэ гузэвэгъуэ хадзэ. 
Къызэхуэсахэр тепсэлъыхьащ цIыхубэ, дин зэгухьэныгъэхэм, волонтёрхэм наркотикхэм замыубгъуным хуэгъэзауэ ящIэфынухэм. КъБР-м и Iэтащхьэм унафэ ищIащ ахэр нэхъыбэрэ Iуэхум къыхашэну, наркотикхэм ебэнынымкIэ IуэхущIапIэм и лэжьыгъэр щIигъэхуэбжьэну, нэхъыщхьэращи, - ахэр зэхьэлIэныр зэрыIуэху мыхъумыщIэр щIалэгъуалэм япхыкIын хуэдэу, гъэсэныгъэ ирагъэкIуэкIыну.