СурэтыщI ГъуазджэхэмкIэ музейм, Ткаченкэ Андрей и цIэр зезыхьэм,  «Миг и вечность». Сто иллюстраций к 100-­летию Виктора Астафьева» зы­фIаща гъэлъэгъуэныгъэ щокIуэкI. Ар теухуащ урыс тхакIуэ цIэрыIуэ Ас­тафьев Виктор къызэралъхурэ илъэси 100 зэрырикъум. 

Гъэлъэгъуэныгъэм хагъэхьащ УФ-м и цIыхубэ художник, КъБР-м щIыхь зиIэ и сурэтыщI, республикэм и Къэрал саугъэтым и лауреат, ХудожествэхэмкIэ Урысей Академием и член-корреспондент, профессор, Красноярск ксилографиемкIэ щыIэ студием и къызэгъэпэщакIуэ икIи абы и унафэщI Пащты Германрэ абы и гъэсэнхэмрэ тхакIуэм и Iэ­да­къэщIэкIхэм щыщ Iыхьэхэр уи нэгу къы­­щIэзыгъэхьэ я графикэ лэжьыгъэ­хэр. Зэуэ къыхэдгъэщынщи, ягъэлъа­гъуэ лэжьыгъэхэр Пащтым музейм тыгъэ хуищIащ. 
КъБР-м щэнхабзэмкIэ и министрым и къуэдзэ Карчаевэ Iэминат зэхыхьэр къы­щызэIуихым къыхигъэщащ Астафьев Виктор урыс литературэм и тхакIуэ па­жэ­хэм зэращыщыр.
- Фигу къэзгъэкIыжынщи, художник Iэзэ Пащты Герман республикэм тыгъэ къыхуищIащ и гравюрэ 1100-рэ, Къэбэрдей-Балъкъэрым и Къэралыгъуэр илъэси 100 щрикъум ирихьэлIэу. Мы выставкэри аращ зи фIыгъэр. Мы сурэтхэмкIи музейм къыхуоупсэ. Уи зэфIэкIым, Къэ­бэрдей-Балъкъэрымрэ абы щып­сэу­хэм­рэ фIыуэ зэрыплъагъум папщIэ фIыщIэ пхуэфащэщ! - жиIащ Карчаевэм. 
КъБР-м и цIыхубэ сурэтыщI Жылэ Анатолэ игу къигъэкIыжащ, илъэсипщI бжыгъэкIэ узэIэбэкIыжмэ, Астафьев Виктор и тхыгъэхэр зэIэпахыу зэрыщытар, абы и Iэдакъэ къыщIэкIахэм ящыщу гъащIэм и пэжхэр къыщыхьа «Ловлю пескарей в Грузии» и тхыгъэр гукъинэж зэрыщы­хъуар, Пащты Германрэ и студентхэмрэ Ас­тафьевым и лэжьыгъэхэм гулъытэ зэ­рыхуащIар зэригуапэр. 
- Урысейпсо мыхьэнэ зиIэ, щIыналъэм исхэм зэман дэкIмэ зэхащIыкIыну лэ­жьыгъэщ мыхэр, - жиIащ Пащты Герман и къуэ, КъБР-м и цIыхубэ художник Пащты Хъан Алим. - Налшык къалэм щагъэлъагъуэ лэжьыгъэхэм хуэдэхэр дуней псом щыIэ музей нэхъыфIхэм щахъу­мэ. ЩIыналъэм щыпсэухэм гъэлъэгъуэ­ны­гъэмкIэ сынывохъуэхъу!
ТхакIуэ икIи журналист Терехов Игорь къытеувыIащ Астафьевым и гъащIэмрэ гуащIэмрэ, абы и адэр щалъхуа щIыналъэм ирагъэIэпхъукIауэ зэрыщытам, и анэр пасэу зэрыфIэкIуэдам, езыр Хэку зауэшхуэми нэгъуэщI гугъуехь куэдми зэрыпхыкIам. 
- Астафьев Виктор нэхъ пасэу и Iэдакъэ къыщIэкIа тхыгъэхэм художникхэм гулъытэ зэрыхуэфщIар гуапэщ. Нэхъыщ­хьэращи, мы Iуэхури, абы къы­зэщIев­гъэубыда сурэтхэри къывэхъу­лIащ, - щIигъужащ Тереховым. 
Пащты Герман жиIащ Астафьевыр илъэси 100 щрикъум ирихьэлIэу ксилографиемкIэ школым екIуалIэ и гъэсэнхэм я гъусэу ХудожествэхэмкIэ Урысей Академием выставкэ къызэрыщызэIуихар, гравюри 100 абыи зэрыхигъэхьар, мыгувэу Норильски апхуэдэ гъэлъэ­гъуэныгъэ зэрыщекIуэкIынур. Герман къы­хигъэщащ а лэжьыгъэхэм зэма­нышхуэ зэрытекIуадэр: эскизхэм - илъэс ныкъуэ, лэжьыгъэхэр гъэхьэ­зы­рыным - апхуэдиз дыдэ.
Музейм и унафэщI Ремхен Еленэ ­Пащты Герман фIыщIэ хуищIащ гъэлъэгъуэныгъэм гугъу зэрыздригъэхьам, музейм тыгъэфI къызэрыхуищIам папщIэ.
ТЕКIУЖЬ Заретэ