Озгъан ыйыкъда Нейтринону орта школунда къууанчлы жумуш болгъанды. «Билим бериу», «Бусагъатдагъы школ» деген миллет программаланы чеклеринде  керти илмула  жаны бла «Точка роста» деген ара ачылгъанды. Ол жангы атламланы, байламлыкъны, чыгъармачылыкъны бла жангычылыкъны майданы боллукъду.
   Араны ачылыууна жораланнган байрам жыйылыугъа школну таматасы Къартлыкъланы Фатимат, аны окъутуу-юйретиу жаны бла орунбасары Атабийланы Светлана, устазла бла окъуучула, аланы аталары эм аналары келгендиле.
  Кесини алгъыш сёзюнде  школну таматасы Фатимат Заурбековна  бу илмуну мурдорунда ачылгъан гуманитар-цифралы араны мектепге уллу магъанасы болгъанын энчи чертгенди. Программагъа кёре  кёп дерслени мындагъы техниканы хайырлана, жангы амаллагъа таяна, иги да зауукълу эм терен къурар онгла ачылгъанын айтханды.  Бу ёмюрде билим неден да магъаналы, багъалы болгъанын сабийлени  ангылагъанлары  аланы жылны ахырындагъы сынамланы  берген эсеплеринде кёрюнеди. Дерследен тышында алгъан билимлери да алагъа жашауларында уллу себеплик этеригин белгилегенди. Энди  сабийлени мында кеслери алларына проект ишле жарашдырыр, медиа жумушлагъа юйренир онглары болгъанына къууаннганын да  айтханды ол. 
    Аталаны бла аналаны атларындан Инна Рубцова мектепни таматасын, устазларын бла окъуучуларын алгъышлагъанды. Бизни къыралда сабийле барысы да бирча онгла  бла хайырланыргъа эркин болгъанларын айта, аланы школларында да энди билим бериуню бусагъатдагъы излемлерине келишген ара ачылгъаны бла алгъышлагъанды.
  Башланнган классланы окъуучулары бла устазлары аламат программа жарашдырып  кёргюзтгендиле. Абадан классланы окъуучулары уа назмула айтхандыла.
 Байрам бошалгъандан сора  «Точка роста» араны устазлары окъуучулагъа бла къонакълагъа экскурсия бардыргъандыла. Сабийле жангы оборудованияны  кёрюп, алада ишлериклерине  къууаннгандыла. 
Керти да магъаналы жумуш болгъанын устазла да чертгендиле. Окъуучуланы дерсден тышында билим алыулары, андан сора да, экзаменлеге хазырланыулары  энди тынчыракъ боллугъун билдиргендиле. 

Темуккуланы Асият