Къулийланы Къайсын атлы Малкъар къырал драма театрны артистлери Алтай Республикагъа «Уллу гастрольлагъа» кетгенлерини юсюнден алгъаракълада билдирген эдик. Ала Горно-Алтайск шахарны П.В.Кучияк атлы Миллет драма театрында  кёргюзтюрюкдюле сахна оюнларын. Озгъан байрым кюн а анда «Уллу гастрольлагъа» жораланнган пресс-конференция бардырылгъанды. Аны ишине Алтай Республиканы маданият министрини орунбасары  Елена Шатина, П.В.Кучияк атлы Миллет  драма театрны баш режиссёру, республиканы  искусствосуну сыйлы къуллукъчусу Эмма Иришева, Малкъар драма театрны директору, КъЧР-ни эмда КъМР-ни сыйлы артисти Жангоразланы Мажит, баш артистледен бири Гиляхланы Мурат да къатышхандыла.
Елена Шатина Малкъар театрны артистлерине, келген къонакълагъа бла журналистлеге ыспас этгенди, бу гастрольла федерал программагъа кёре бардырылгъанларын эсгертгенди. «Эки республиканы театрларыны араларында байламлыкъла мындан ары да айнырыкъларына, шуёхлукъ жюрютюллюгюне ийнанама», – дегенди.
Жангоразланы Мажит а  къонакъбай  Алтай Республиканы оноучуларын, Маданият министерствосун, КъМР-ни Маданият министерствосун эмда «Росконцерт» федерал учрежденияны театргъа аллай онг берилгени ючюн жюрек ыразылыгъын билдиргенди. «Бизге мында  къарындашларына-эгечлеринеча жарыкъ тюбегендиле. Биз бери  юч пьеса, концерт программа да келтиргенбиз. Аланы барын да сиз жаратырсыз, эсигизде къалыр деп да ийнанама. Сау болугъуз, къонакъбайлы алтайчыла!» – дегенди ол.
Андан сора уа къараучула театргъа келип башлагъандыла. Сахна оюн кёргюзтюлюрню  аллында  Елена  Шатина  Алтай  Республиканы маданият министри Ольга  Антарадонованы атындан Жангоразланы Мажитге алгъышлау письмону, алтай тилде жазылгъан китапны да саугъагъа бергенди.
Малкъар театрны артистлери  уа Къулийланы Къайсынны  назмусуна кёре жазылгъан «Мамырлыкъ эмда къууанч сизге, саула!» деген жырны малкъар тилде айтхандыла.
Андан сора артистлерибиз Чингиз Айтматовну «И дольше века длится день» романына кёре «Ажашханла» деген  сахна оюнну кёргюзтгендиле. Ол бошалгъанда, къараучула, ёрге туруп, толкъун къарслары бла ыразылыкъларын билдиргендиле. Алтайлы жазыучу Иван Белеков Малкъар театрны артистлерине, режиссёрларына да алагъа  аллай магъаналы сахна оюнну келтирип кёргюзтгенлери ючюн, кёп ариу сёзлерин айтып, ыспас этгенди, Россейни сыйлы художниги Амыр Укачин а  атасы Борис Къулийланы Къайсын бла уллу шуёхлукъ жюрютгенлерин айтханды.   
– Къайсын Шуваевич бизни юйде къонакъда да кёп кере болгъанды. Атам бла олтуруп, кёп затны юсюнден ушакъ этиучюлери да эсимдеди. Аны китаплары  бизни юйде сыйлы жерде турадыла. Аланы атам барысын да окъуп чыкъгъан эди.  Бюгюнлюкде аланы мен окъуйма. Ала жашаугъа ышандыргъан, жюрекге жетген назмуладыла. Атам Къайсынны  къарындашыча кёрюучю эди. Мен аны жиляп бир заманда да кёрмегенме, Къайсын ауушханын эшитгенинде уа, кёз жашларын тыялмагъанды. Аллай уллу шуёхла эдиле ала.  Сизни бери келгенигиз да манга  бек хычыуун кёрюндю,  Къайсынны жерлешлерине тюбегениме бек къууанама», – дегенди суратчы.   
Театрны директору Светлана  Пешперова  эмда баш режиссёр Эмма Иришева уа алада жюрюген сыйлы адетледен бирин этдиле – Жангоразланы Мажитни  белине  бел бау такъдыла. 
Уллу гастрольланы экинчи  кюнюнде, къараучуланы къарслары къагъыла тургъанлай, артистлерибизге тюрлю-тюрлю саугъала берилгендиле.  

Холаланы Марзият.