«Кавказ Ищхъэрэм ис лъэпкъхэм я зэныбжьэгъугъэр» фIэщыгъэр зезы­хьэ, лъакъуэрыгъажэкIэ къызэ­дэ­жэнымкIэ 32-нэ зэхьэзэхуэм и ебланэ Iыхьэр Налшык къалэм щекIуэкIащ. Махуэ куэду зэхэт зэпеуэм кърихьэлIащ Урысей Федерацэмрэ Белоруссиемрэ я спортсмен лъэщхэр. 

Зэхьэзэхуэр щрагъэжьащ Налшык къалэм, Абхъазым и утыкум деж икIи адэкIэ Шэджэм, Бахъсэн щIыналъэхэм ирикIуащ, къыщыувыIахэр Iуащхьэмахуэ лъапэ щыIэ Iуащхьэмахуэ къуажэрщ. А щIыпIэр тенджыз щхьэфэм нэхърэ километритIкIэ нэхъ лъагэщ. Псори зэхэту спортсменхэм къызэпачащ километри 135-м щIигъу зи кIыхьагъ гъуэгуанэ.
Мыбдежым цIыхухъу балигъхэм я деж япэ увыпIэр къыщихьащ Тулэ областым щыщ Новиков Саввэ. ЕтIуанэ хъуащ Сверд­ловск областым и гъэсэн Ульянов Артем, ещанэр Иванов Вячеславщ (Санкт-Петербург) къалэ. 
ЩIалэгъуалэм я зэпеуэм япэ увыпIи­щыр къыщахьащ Болдырев Матвей, Гречишкин Вадим, Созинов Владислав сымэ - щыри Санкт-Петербург щыщщ.
«Гуапэт плъагъуну ди спортсменхэм ныпхэмрэ плакатхэмрэ яIыгъыу жылэ къэс цIыхухэр къазэрыщыпежьэр, абы­хэм къазэрыдэщIыр. «Кавказ Ищхъэрэм и лъэпкъхэм я зэныбжьэгъугъэ» зэхьэ­зэхуэр къызэрежьэрэ КИФЩI-м и спортсменхэм, лъэпкъхэм я зэкъуэтыныгъэр игъэбыдэ къудей мыхъуу, и фIыгъэ куэди йокI къэралым лъакъуэрыгъажэ спортым зыщегъэужьынми», - жиIащ ­КъБР-м Лъакъуэрыгъажэ спортымкIэ и федерацэм и унафэщI Занкишиев Арсен. 
ЕтIуанэ махуэм, фокIадэм и 15-м, зэ­хьэзэхуэм и еянэ Iыхьэр – критериумыр - Налшык къалэм и уэрамхэм щекIуэкIащ. Абы хыхьащ Лениным и цIэр зезыхьэ, Балъ­къэр, ЩоджэнцIыкIумрэ Тэрчо­къуэм­рэ я цIэхэр зезыхьэ уэрамхэм. Зэ­хьэ­зэхуэр хухахащ Олимп джэгухэм, дуней псом я чемпион, лъакъуэрыгъажэ спортымкIэ дуней псом щыцIэрыIуэ Шыхъуэ Борис. Мыбдежым спортсменхэм къызэпачащ километр 65,2-рэ зи кIы­хьагъ гъуэгуанэр. 
Зэхьэзэхуэм щIидзэным и пэ къихуэу Къэбэрдей-Балъкъэрым и Iэтащхьэ КIуэ­кIуэ Казбек спортсменхэмрэ зэпеуэм кIэ­лъыплъыну къэкIуахэмрэ мыпхуэдэ псалъэхэмкIэ захуигъэзащ:
«Гуапэу фыкъызогъэблагъэ нобэрей зэхьэзэхуэм хэтхэр, пщIэ зыхуэтщI ди хьэщIэ лъапIэхэр, хьэщIэкIэ щIыналъэ жумарту щыт Къэбэрдей-Балъкъэрым. Си гум къыбгъэдэкIыу фIыщIэ ин фхузощI нобэрей гуфIэгъуэшхуэр Къэбэрдей-Балъкъэрым и цIыхухэм къа­зэ­рыхуэфхьам папщIэ.
Нобэ ди къару, ди зэфIэкI идохьэлIэ мы спорт лIэужьыгъуэм Къэбэрдей-Балъкъэр Республикэм нэхъ жыджэру зыщиу-жьыным, адэкIи нэхъри абы дегугъунущ. Псом нэхъыщхьэжращи, дэ дызыдэплъеин диIащ, Шыхъуэ Борис, Олимп джэгу­хэм я чемпионыр, щIалэгъуалэм я щапхъэр.
Шэч къытесхьэркъым, лъакъуэрыгъа­жэ спортым республикэм нэхъри зыщиужьыным нобэрей зэхьэзэхуэр шэсыпIэ зэрыхуэхъунум. 
МыдэкIэ, зэхьэзэхуэм хэтхэм сехъуэхъуну сыхуейт ехъулIэныгъэхэр, текIуэныгъэ­хэр яIэну, я насып нэхъыбэ хъуну. Псоми фIыщIэ яхузощI!»
Зэхьэзэхуэм и еянэ Iыхьэм кърикIуахэр зэхалъхьэжа нэужь цIыхухъу балигъхэм я деж япэ увыпIэр къыщихьащ Свердловск областым щыщ Вьюношев Михаил, етIуанэ хъуащ Белоруссием и спортсмен Тур Никитэ, ещанэр Самарэ областым и лIыкIуэ Савельев Денисщ.
ЩIалэгъуалэм я зэпеуэм щытекIуащ Санкт-Петербург къалэм къикIа Никонов Александр, етIуанэ увыпIэр къихьащ Калининград областым и спортсмен Белоусов Иван, ещанэ хъуащ Санкт-Петербург  щыщ Попов Марк. 
Фигу къэдгъэкIыжынщи, мы зэхьэзэ­хуэр щрагъэжьауэ щытар 1993 гъэм, Мейкъуапэ къалэрщ икIи ар къыхэ­зылъ­хьар Адыгэ республикэм и япэ Президент Джарым Аслъэнщ. КъыкIэлъыкIуэ илъэ­сым «Кавказ Ищхъэрэм и лъэпкъхэм я зэныбжьэгъугъэр» хагъэхьащ Урысей Федерацэм лъакъуэрыгъажэ спортымкIэ и чемпионатым щыщ, махуэ куэду зэхэт зэпеуэм и зы Iыхьэу. Мыбдежым къыщы­зэдэжэхэр цIыхухъухэрщ.
Иджы екIуэкIа зэхьэзэхуэм хэтахэм къызэпачащ Адыгейм, Краснодар крайм, Къэрэшей-Шэрджэсым, Къэбэрдей-­Балъкъэрым, Осетие Ищхъэрэ – Ала­нием­, Шэшэным я щIыналъэхэр. Псори зэхэту гъуэгуанэу километр 1509-рэ къ­а­кIуащ. 

ХЬЭЩЫКЪУЕЙ Олег.