Къабарты-Малкъарны Жамауат палатасында малланы жайлыкълагъа жибериуню хайырлылыгъын ёсдюрюуню амалларын сюзгендиле. Жыйылыугъа республиканы Эл мюлк министерствосунда Жамауат советни келечилери да къатышхандыла.

Палатаны профильли комиссиясыны башчысы Юрий Колесников белгилегенича, малланы жайыуда жайлыкъланы магъанасы бек уллуду, алай ала толусунлай хайырланылмайдыла. Малчылагъа къыйын болмазча жайлыкълагъа элтген жолланы тапландырыргъа, электро эм суу ызланы тартыргъа керекди. Малчылыкъны айнытыргъа, аны файдалыгъын ёсдюрюрге, адамланы бу иш бла кюреширге итиндирирге керекди, дегенди ол.

Эл мюлк министрни орунбасары Тимур Вадахов билдиргенича, таулада жайлыкъла 142,6 минг гектар жерни аладыла, аладан 122,5 минг гектары эл мюлкге бёлюннген жерледиле. Ала 1000 – 2500 метр бийикликде орналадыла, кёбюсюнде шауданла, суула бардыла.

Жерле эм мюлкле халла жаны бла министерстводан келтирилген эсеплеге кёре, 2024 жылны 1 июнунда республикада къырал иеликде 1351 жер участка барды, ол битеу да 152 987 гектарды. Андан 622 участкасы – 151 153,39 гектар эл мюлкге бёлюнюпдюле, ол сандан 568 жерде – 136998,31 гектар жайлыкъладыла. Аладан 80 проценти хаух берилипдиле, баргъан жылны беш айыны ичинде андан 31 829,79 минг сом файда тюшгенди. Участкаланы къалгъан 20 проценти къыйын жерледе болгъанлары ючюн хайырланылмайдыла. Бир  гектарны хаух алыуну бир жылгъа багъасы уа былайды: бахчалагъа – 3700 сом, жайлыкълагъа бла биченликлеге – 250 сом. Къырал иеликде болгъан эл мюлк бла кюреширча жерле хайырланыугъа берилирча, алагъа сурам болур ючюн, аланы тизмеси министерствону, жер-жерли самоуправление органланы сайтларында бериледи эмда «Официал Къабарты-Малкъар» газетде бла ала жерле болгъан районланы асламлы информация органларында басмаланады. 

Ахырында жыйылгъанла Эл мюлк эм Жерле эм мюлкле халла жаны бла министерстволагъа жайлыкълада болумну тинтирге эм аланы бютюн толу хайырланырча программаны жарашдырыргъа эсгертиу этгендиле, деп билдиредиле Жамауат палатаны пресс-службасындан.

Кульчаланы Зульфия.