Алгъаракълада бу суратны редакциягъа Солтанланы Магомед келтиргенди. Хурметли окъуучубуз аны жолоучулукъларындан биринде тюбеген бир сейир болумну юсюнден къысха хапарлагъанды. 
Бедикден 2-3 къычырым ёрге бара бийик къаяны жарылгъанына агъач чюй урулупду. Элбрусчуланы айтханларына кёре, нарт терекни бутагъындан ишленнген чюйге 200-300 жыл чакълы бир болады. Аны алайлыгъын агъачдан чюй къаты ташча болгъаны да ачыкълайды.
Хапарлада айтылгъаннга кёре уа, буруннгу заманлада Этезланы Атабий былайтын тууарларын сатаргъа сюрюп келе болгъанды, алай жолда бир бугъа аягъын сындыргъанды. Атабий, аны союп, терисин а, жаныуар тиймезча, бу къаягъа агъач чюй уруп, анга тагъып кетгенди, къайта келгенинде алырча.
Османланы Хыйса бла баргъан эдик ол тийреге бир кюн. Чюй болгъан жерге къыйналып ёрлеп, сындырыргъа къоркъа, аны женгил ургъаныбызда, ол темирча зынгырдагъан эди. Аны базыкълыгъы – 7 сантиметр, хауагъа чыкъгъаны уа 1 метр болады. Атабий терекни бутагъын чюй этип ургъан жерге жауун, къар да тиймейди. Бу бутакъ къайын неда тал болса, чирип, ургу боллукъ эди. Бутакъ нарт болгъаны себепли, ол, ташча, темирча къатып, чиримей турады.