Жангыз бир адамны жигерлилигини хайырындан ёмюрлени теренинден келген къол усталыкъ бюгюн да тас болмай, унутулмай турады. Сёз Огъары Малкъарда кийизле, жамычыла, башлыкъла этген уста Црайланы Къанитатны юсюнденди.

Къарачайлы тенгим Лепшокъланы Алимбий тау артында жашагъан тукъум къарындашларына къонакъгъа тебирей туруп, башлыкъ керек болгъанын айтады бир жол. Эки республикада да излеп, ол жаратханын тапмагъанын да билдиргенди ол. Аны излей, Огъары Малкъаргъа бардыкъ. Къанитатны уа кезиулю жамычысын кенг арбазда тиге тургъанлай кёрдюк. Биз андан башлыкъны эки къанатына тукъумну тамгъасын, Минги тауну суратын салырын тиледик.

Жолгъа тебиреп тургъанланы жумушун а къысха заманнга тындырмаймы боллукъса. Къанитат да, сау болсун, кече жукъудан бёлюнсе да, жумушубузну тамамларгъа сёз берди. Адам уста болуп, айтхан сёзюне да ие болса, халкъны ыразы этеди. Башлыкъны алып, ыспас да этип, ашыгъышлы кетип тебирегенибизлей, Къанитат бизни тыйды да, къоймай, сувенир жамычычыкъла да берди.

Бу усталыкъгъа къайда, кимден юйреннгенин сордум мен а анга.

- Хасауланы Асхар ара мюлкню таматасы болгъан кезиуде къумалы къарачай къойланы тута эдиле. Аланы жюнлерин сатар онг болмай, жыйылып туруучу эди. Ол кезиуде жамычыла этген цех къураргъа оноулашадыла. Анда ишлерге Кужонланы Къанитат, Батталаны Жансурат, Нёгерланы Шамса, Гуппойланы Шахидат, Црайланы Наифхан, сора мен да тохтайбыз.

Ол кезиуде не сыйлы къонакъгъа да жамычы кийдирип, алай сыйлаучу эдиле. Жыйылып тургъан жюнден хазна жукъ къалмады. Ара мюлкге да хайыр тюше тебиреди. Заказла уа кёп жерледен келе эдиле. Юйреннген а атамы анасы Малкъондуланы Сейрхандан этген эдим. Кюн сайын жюнню ийлеп тургъан тынч да тюйюлдю, алай усталыгъыбызны тохтамай ёсдюре турдукъ.

Жамычыла этген цех жабылгъандан сора уа, ол жумушну юйде этип башладым. Андан бери 25 жыл озду. Мен этген затла Америкагъа дери да кетгендиле.

Кийизге кёп тюрлю накъышла салгъандан сора да, тукъум тамгъалары, тауларыбызны суратлары болса сюйгенле да кёпдюле. Аланы излемлерин толтура, кесим да жаратырча этерге кюрешеме. Къолдан усталаны кёрмючлерине чакъырадыла, алай заказла кёпден, аланы хар бирине къатышыр онгум да жокъду, - деди Къанитат сорууума жууаплай.

Бир сейирим, быллай устадан юйренирге сюйгенле табылмагъанларыды. Ол жанына эс бёлюнсе, тамблагъы кюнюбюзге себеплик боллукъ эди.

Мамайланы Алий.