Айырмалы фахму энчиликлери болгъан инсанланы къырал информация ресурсуна Къабарты-Малкъар Республикадан 826 школчу къошулгъанды. Аны юсюнден социал сетьде кесини страницасында КъМР-ни Башчысы Казбек Коков айтханды.
«2023-2024 окъуу жылда къуралгъан федерал олимпиадаланы бла эришиулени эсеплерине тийишлиликде Къабарты-Малкъар Республикадан 826 сабий айырмалы фахму энчиликлери болгъан инсанланы къырал информация ресурсуна къошулгъандыла. Аладан асламысы окъуугъа кирирге онг тапдыргъан экзаменлени бермегенлей, олимпиадаланы бла эришиулени ызларына кёре алчы россей вузлада окъургъа эркинликлерин хайырланнгандыла. Ол билим бериуде уллу ишибизни бир магъаналы жетишимиди. Билим бериуню даражасын кётюрюу регионнга Президентибиз Владимир Владимирович Путин салгъан магъаналы борчладан бириди», – деп айтылады публикацияда.
«2019 жылдан башлап республикада билим бериу объектлени къурулушлары кенг бардырылады, бюгюнлюкде 16 жангы мектеп ачылгъанды, ол ызда ишни бардыргъанлай турабыз. 65 школ мекямгъа тынгылы ремонт этилгенди, дагъыда 57-син юч жылны ичинде тийишли халгъа келтирликбиз. 5 жылгъа хайырланыугъа 55 жангы сабий сад берилгенди, школгъа дери билим берген махкемелени тынгылы ремонт этиу жаны бла жангы федерал программагъа къошулабыз. Устазланы айлыкъларын ёсдюрюу жаны бла иш бардырылады – бир бири ызындан тёрт жылны бюджет бёлюмню ишчилерини айлыкълары 10 процентге ёседиле. 2022 жылны ахырындан башлап республиканы битеу устазларына иш хакъларына къошакъгъа ай сайын 3000 сом ёлчемде ахча тёленеди. Андан сора да, 5 мингден артыкъ педагогла класс башчылыкъ ючюн федерал тёлеулени аладыла, окъуучуланы Битеуроссей школ олимпиадада жетишимлери ючюн устазлагъа кёллендириу система сингдирилгенди. Аны эсеплерине кёре республика СКФО-да экинчи жыл бир бири ызындан алчылыкъдады, – деп белгилегенди Казбек Коков. – Фахмулу сабийлени ачыкълау, айнытыу эм алагъа билеклик этиу ызны да къурайбыз. Мында регион билим бериу «Антарес» ара магъаналыды, анда 2019 жылдан бери 7 мингден артыкъ школчу билимлерин ёсдюргендиле. Республикада асламлагъа деп къуралгъан шёндюгюлю билим бериу болумланы къурау эм магъаналылай къалады».