Налшык къалэм дэт «ДыгъафIэ къалэ» творчествэмкIэ сабий академием Урысей Федерацэм и Президентым и лIыкIуэу КИФЩI-м щыIэ Чайкэ Юрий и жэрдэмкIэ иджыблагъэ къыщызэIуахащ иджырей робототехникэм и щэхухэм щыхурагъаджэ РОББО-классхэр. 

Абы щеджэ цIыкIухэм гуапэу зыхуагъэзащ КъБР-м и федеральнэ инспектор нэхъыщхьэ Васильченкэ Дмитрийрэ КъБР-м бжыгъэр зи лъабжьэ технологиехэм зегъэужьынымкIэ и министр Бозий Аскэррэ.
Хъыбар зэрыщыIащи, Кавказ Ищхъэрэм и щIыналъэхэм псоми мыпхуэдэ классхэр къыщызэIуахащ. Абыхэм щыхурагъэджэнущ робототехникэм, микроэлектроникэм, схемотехникэм, физикэм, программэхэр зэхэгъэувэным, 3D Iэмалхэм и щэхухэм, нэгъуэщIхэми. Абы щеджэну цIыкIухэм я ныбжьыр илъэси 5-м къыщыщIэдзауэ 18-м нэсыхукIэщ. 
Къыхэдгъэщынщи, мы гъэ еджэгъуэщIэм хиубыдэу къэралым и курыт еджапIэхэм псоми я егъэджэныгъэ программэм «Технологие» дерсым и зы Iыхьэу «Робототехникэр» хагъэхьащ. 
ХЬЭЩЫКЪУЕЙ  Олег.