Къэбэрдей-Балъкъэрыр къызэрыунэхурэ илъэси 100 зэрырикъум и щIыхькIэ щыIэ галереем къыщызэIуахащ «Дахагъэр зи псэм хэлъхэр» гъэлъэгъуэныгъэ гъэщIэгъуэныр.
Мыбы утыку къыщрахьащ республикэм и сурэтыщI пажэхэм я лэжьыгъэхэри, ныбжьыщIэхэм ящIахэри. Абы ущеплъыфынущ Аккизов Керим, Тураев Рустам, Иуан Рустам, Хъалил Миланэ, ХьэцIыкIу Миланэ, Дзэгъэл Iэуес, Смуровэ Элеонорэ, Аханов Александр сымэ я лэжьыгъэхэм. Бжьыхьэ пасэм и къеблэгъэкIэм пэджэж сурэтхэмрэ инсталляцэхэмрэ щызэхэухуэнащ плъыфэ зэхуэмыдэхэр. КъызэгъэпэщакIуэхэм къыхагъэщащ гъэлъэгъуэныгъэм гущIагъщIэлъ къэIуэтэкIэ зэхуэмыдэхэр къигъэлъагъуэу зэрызэхагъэувар. Сурэтхэр зэм щхъуэкIэплъыкIэщ, зэм щымщ, зэм нэжэгужэщ, зэм пшэплъ мащIэкIэ иIа пшыхьхэр уагъэлъагъу.
Аккизов Керим и лэжьыгъэхэм бжьыхьэ дунейм и хъугъуэфIыгъуэхэр къыхощ. Гъэлъэгъуэныгъэм хэтщ абы и «Зыгъэпсэхугъуэ» инсталляцэр, «Удзхэр» сурэтхэр. Тхыпхъэхэм, плъыфэхэм, дамыгъэхэм я дунейм ухешэ ХьэцIыкIу Миланэ и «Махуэрытх щхъуантIэ» сурэт зэрыIыгъым. Макшаевэ Алия и лэжьыгъэхэм къыхощ литературэ лIыхъужьхэр. Мы гъэлъэгъуэныгъэм хэтщ Брэдбери Рэй и «Къэрабэхэм къыхэщIыкIа шагъыр» романым абы трищIыкIа арт-тхылъыр. Сокъур Каринэ гукъыдэжыр зэриIэт Iэмалщ плъыфэхэмкIэ IэкIуэлъакIуэу къызэрыдэпсалъэр. Хъалил Миланэ игъэлъагъуэ «Iэуэлъэуэншагъэ» зыфIища сурэт гупым щызэщIэжьыуэркъым плъыфэ щхъуэкIэплъыкIэхэр, атIэ абыхэм гур ягъэпсэху, хуэму гупсысэм ухашэ. Дзэгъэл Iэуес «Пасэрей Налшык» зыфIища сурэтым щыдолъагъу Къэбэрдей уэрамым и зы плIанэпэ. Абы иIэщ пасэрей теплъэ: «Победа» киногъэлъэгъуапIэм, абы пэгъунэгъу унэ лъахъшэхэм, фащэ ящыгъыу уэрамым къыдыхьа бзылъхугъэхэм, шыгу зэщIэщIам кIэлъыбанэ хьэм, бжыхькIэ къэхухьа пщIантIэм щыплъагъу жьыщIыгъэ кIапсэм гупсысэхэр блэкIам яшэж. Иуан Рустам и теплъэгъуэхэр нэхъапэхэм ягъэлъагъуэу дызэмыса лэжьыгъэ гъэщIэгъуэнщ - псы зэрыт банкIхэм «ириубыдащ» - зым шэIумылхэр, адрейм хы Iуфэм зэрыIут вакъэ, ещанэм псыIэфI щIыIэхэр.
Къалэм и щытыкIэр, зыщIыкIэр, щIэрэщIэкIэр икIи зыгъэфIэкIэр уэзыгъэлъагъу сурэт къыхэщыпыкIахэрщ гъэлъэгъуэныгъэм щызэхуахьэсар. Гъуазджэм и дуней щэхукIэ бжьыхьэм хыхьэну гукъыдэж зиIэхэр галереем фрагъэблагъэ фокIадэ мазэр и кIэм нэблэгъэху.
ГУГЪУЭТ Заремэ.
Сурэтхэр Къарей Элинэ трихащ.
