Кёп болмай «Россети Северный Кавказ» - «Каббалкэнерго» биригиуню балансла жаны бла комиссиясыны кенгеши болгъанды. Анда Къабарты-Малкъарда быйыл алты айгъа хайырланылгъан электрокюч ючюн 3,7 миллиард сомгъа жууукъ тёленнгени, ол кёрюмдю 89 процентге жетгени айтылгъанды. Былтыр бу заман бла тенглешдиргенде, ол 0,7 процентге кёп болгъаны да белгиленнгенди, деп билдиргендиле «Каббалкэнерго» биригиуню пресс-службасындан.

- Бирси жылладача, уллу борчлары болгъанлагъа жашау журт -коммунал мюлк предприятияла саналадыла. Сагъынылгъан кезиуде ала жаланда борчларыны 31 процентин жабалгъандыла. Болсада энтта да 2,3 миллиард сом берликлери барды, - дегенди «Каббалкэнерго» биригиуню таматасы Резуан Загаштоков.

Жарсыугъа, жашау журтлада жашагъанланы да бир къаууму хайырланнган ток ючюн заманында тёлерге ашыкъмайдыла. Сёз ючюн, быйыл жети айгъа тёлемей уллу кёллюлюк этгенлеге 14 миллион сом чакълы пеня жазылгъанды. Алай бла борчлуланы бир къаууму болумлары бютюн осалына кетерин сезип, 2,6 миллион сом чакълы тёлегендиле. Болсада ол борчну жаланда 18,5 процентиди.

 Кёп заманны тёлемей, борч этип тургъанла игилик бла ангыламасала, аланы закон бла жууапха тартырча онг барды. Аллай амаллагъа: ишлерин сюдге бериу, токну хайырланалмазча чек салыу киреди. Уллу кёллюлюк этген борчундан тышында юсюне тазир да тёлерге тюшерикди. Алай болмазча уа айны онунчусуна дери берликлеринден къутулса игиди. Токну багъасын компанияны https://gp-lc.rossetisk.ru/ сайтында «Энчи кабинетде», «Свет онлайн» приложенияда, адамланы жумушларына къарагъан аралада тёлерге жарайды.

Эсге сала айтсакъ, «Свет онлайн» приложенияны иги кесек адам хайырланады. Сервисни  GooglePlay - https://play.google.com/ эм AppStore - https://apps.apple.com/ сайтладан алып этерге онг барды. Аны себеплиги бла комиссиясыз тёлерге, эсеплеген приборда ненча ойнагъанын жиберирге, къайсы айда къаллай бир берилгенине квитанция бла шагъырейленирге болады. Быллай амал энергокюч компания бла абонентни арасында байламлыкъны бютюн бек кючлегенин да белгилерчады.

«Россети Северный Кавказ»-«Каббалкэнерго» биригиуню келечилери токну къаллай бир ойнагъанын айны 23-26 кюнлеринден кеч къалмай жиберирге эм тёлеулени уа онусуна дери этерге кереклерин эсге саладыла.